«Sán ındýstrııasy» atty jeńil jáne toqyma óndirisiniń Halyqaralyq kórmesi aıasynda jas dızaınerler arasynda uıymdastyrylǵan saıysqa J. Kóshkin «Kostıým» atalymy boıynsha qatysyp, kópshilik nazaryna Art on Rocks etnostılindegi áıelder kıiminiń toptamasyn usyndy. Konkýrsqa Italııa, Belarýs, Ulybrıtanııa, Fransııa, Reseı jáne Qazaqstannan kelgen 100-den astam dızaıner «Tekstıl», «Grafıkalyq dızaın», «Kostıým» nomınasııalary boıynsha baptary men baqtaryn synady.
– Úsh kúnge sozylǵan baıqaýda 143 joba usynyldy. Sonyń ishinde «Kostıým» baǵyty boıynsha 34 jumys, «Tekstıl» baǵyty boıynsha 51 jumys fınalǵa joldama aldy. Onlaın daýys berý nátıjesinde «Kásiptik oqytý» mamandyǵynyń stýdenti Jazıra Kóshkinniń jumysy júldeli úshinshi orynǵa laıyq dep tanyldy, – deıdi jetekshisi, Kásiptik bilim kafedrasynyń oqytýshysy Uljan Alashabaeva.
Onyń aıtýynsha, Qyzdar Ýnıversıtetiniń stýdentteriniń búginge deıin qol jetkizgen jetistikteri bir bul ǵana emes. Buǵan deıin de bilimgerler respýblıkalyq, aımaqtyq sán baıqaýlarynda «júzden – júırik, myńnan – tulpar» shyǵyp, júldeli oryndarǵa ıe bolyp júr. Oqý ornynyń ustazdardy sándik-qoldanbaly óner buıymdaryn jasaýdy jastarǵa jete tanystyryp, bolashaq mamandardyń kásibı sheberligin arttyrýdy kózdep otyr.
– Maqsatymyz – stýdentterge qazaq halqynyń san ǵasyrlar boıy jınaqtalǵan estetıkalyq, mádenı muralaryn tereń meńgertý arqyly olardyń tanymdyq kózqarasyn qalyptastyryp, qolónerge qyzyǵýshylyqtaryn oıatý. Ulttyq kıim úlgilerindegi elementterdi jańa úlgidegi ulttyq kıimderge endirip, sony brendtter qalyptastyrsaq degen oıdamyz, – dep atap ótti U. Alashabaeva.
Jazıra Kóshkin sabaqtan tys ýaqytta dızaındyq kıim úlgileri men kolleksııalardy modeldep, qurastyrýdy ádetke aınaldyrǵan.
– Qazirgi kúnde eńbek naryǵynda dızaıner mamandaryna degen qajettilik baıqalady. Buǵan sebep te joq emes. Ulttyń ulylyǵyn ulyqtaıtyn buıymdarǵa suranys kún ótken saıyn artyp keledi. Elimiz boıynsha sán ortalyqtary men sheberhanalar da kóptep ashylýda. Basty maqsatym – ata-baba dástúrin keńinen nasıhattap qana qoımaı, zamandastarymdy tól ónerdi baǵalaýǵa, ulttyq murany saqtaýǵa úndeý, – deıdi J. Kóshkin.
