Memleket basshysy eki el arasyndaǵy qarym-qatynastyń senimge negizdelgenin atap ótip, Qazaqstan men Tájikstan halyqtarynyń dostyǵyn nyǵaıtý jolynda Emomalı Rahmonnyń aıryqsha ról atqarǵanyn aıtty.
– Siz basshylyq etken jyldar ishinde biz zor senimge, yntymaqtastyqqa jáne dostyqqa negizdelgen qarym-qatynas ornattyq. Eshqashan aramyzda sheshimin tappaǵan másele bolǵan emes. Biz árdaıym, ásirese halyqaralyq deńgeıde bir-birimizdi qoldap kelemiz, – dedi Qazaqstan Prezıdenti.
Nursultan Nazarbaev búginde eki el arasyndaǵy yntymaqtastyq jańa kezeńge aıaq basqanyn aıtyp, memleketaralyq qarym-qatynastyń ózekti máselelerin talqylaýǵa nıetti ekenimizdi jetkizdi.
– Biz sizdermen kez kelgen máseleni talqylap, sheshýge daıynbyz. Sonymen qatar kórshi memleketterdiń basshylary kele jatyr. Erteń biz úshin taǵy bir márte kezdesýge múmkindik týady. Bıyl sizderde sý resýrstaryn basqarý jónindegi konferensııa ótetinin bilemin. Qazaqstan bul bastamany qoldaıdy, – dedi Memleket basshysy.
Kezdesý barysynda Nursultan Nazarbaev Tájikstan Respýblıkasynyń Prezıdentin «Parasat» ordenimen marapattady.
E.Rahmon Nursultan Nazarbaevqa Qazaqstanǵa shaqyrǵany úshin jáne joǵary marapat tabys etkeni úshin alǵys bildirdi.
– Qazaqstanǵa kelgen ár saparymda Astananyń kelbeti jyldam ózgerip kele jatqanyn baıqaımyn. Bul jetistik, eń aldymen, Sizdiń dana ári kóregen saıasatyńyzdyń jemisi bolyp sanalady, – dedi Tájikstan Respýblıkasynyń Prezıdenti.
E.Rahmon eki el arasyndaǵy saýda-ekonomıkalyq qarym-qatynastyń qarqyndy damyp kele jatqanyna toqtalyp, ony ári qaraı ilgerilete túsýge nıetti ekenin atap ótti.
– Taýar aınalymynyń kólemi jóninen Qazaqstan Tájikstannyń jetekshi ekonomıkalyq áriptesteri arasynda ekinshi orynǵa ıe. Biz elderimizdiń keshendi ári strategııalyq qarym-qatynastaryn nyǵaıtýǵa nıettimiz, – dedi Tájikstan Respýblıkasynyń Prezıdenti.
