Rásimdi ashqan Memlekettik hatshy Gúlshara Ábdiqalyqova Elbasy Nursultan Nazarbaevtyń quttyqtaý sózin oqyp berdi.
«Qazaq televızııasynyń habar tarata bastaǵanyna 60 jyl tolýymen quttyqtaımyn. Búginde qoǵam ómiriniń kúndelikti tynys-tirshiligin teledıdarsyz kózge elestetý qıyn. Sondyqtan bul – otandyq televızııanyń myńdaǵan qyzmetkerleriniń ǵana emes, barsha qazaqstandyqtardyń ortaq mereıli merekesi deýge bolady. Osy jyldarda sizder respýblıkamyzdyń kúrdeli ótkeni men búgingi táýelsiz Qazaqstannyń san-salaly jetistikterin, ózekti problemalaryn der kezinde taspaǵa túsirip, Otanymyzdyń beıneli shejiresin jazyp kelesizder. 1958 jyldyń kókteminde ómirge joldama alǵan Qazaqstan televızııasy búginde kóptegen telearnalardan turatyn, myńdaǵan kásibı mamandar eńbek etetin, úzdik tehnıkamen jabdyqtalyp, joǵary tehnologııalarǵa arqa súıeıtin aýqymdy salaǵa aınalyp otyr. Sonyń ishinde 60 jyldan beri kórermenniń úzdiksiz kózaıymy bolyp kele jatqan qazaq televızııasynyń qara shańyraǵy – Qazaqstan Ulttyq telearnasynyń alatyn orny erekshe», delingen Memleket basshysynyń quttyqtaý hatynda.
2017 jyldan beri jyl saıyn ekran úzdikterin anyqtap, telejýrnalısterdiń kásibı dárejesin kóterýge arnalǵan «Tumar» syılyǵy bıyl 14 atalym boıynsha júzden júırik shyqqan myqtylarǵa buıyrdy. Onyń ishinde Qazaq televızııasynyń 60 jyldyǵy men Astananyń 20 jyldyǵyna arnalǵan qos júlde arnaıy mereıtoılyq atalym boıynsha tabys etildi.
Qazaq televızııasynyń 60 jyldyǵy demekshi, Aqparat jáne kommýnıkasııalar mınıstri Dáýren Abaev qazaq televıdenıesiniń ardagerlerin «Qazaq televızııasyna – 60 jyl» arnaıy mereıtoılyq medalimen marapattap, aǵa býyn áriptesterge qurmet kórsetti. «О́zderińiz biletindeı, Elbasy Nursultan Nazarbaev televızııa salasynyń jańa tehnologııalyq talaptarǵa saı ózgerýi men damýyna zor kóńil bólip, únemi qoldaý bildirip keledi. Bul – jańa medıanyń álemdik talaptarǵa saı damýyna aıtarlyqtaı yqpal etýde», dep sóz bastaǵan mınıstr ári qaraıǵy lebizin ardagerlerge baǵyttady: «Álem zaman talabyna saı ózgerip jatyr. Soǵan sáıkes tehnologııalar da, aqparat almasý ádisteri de zamanaýı óz jolyn qalyptastyrdy. Biraq munyń eshbiri de telejýrnalıstıkanyń basty talaby – óz kásibine degen adaldyq, kórermen aldyndaǵy jaýapkershilik pen qurmetti ózgerte almaıdy», deı kele, televızııa korıfeılerine otandyq telejýrnalıstıkanyń damýyna qosqan súbeli úlesi men keler urpaq kádesine jarar taǵylymdy tájirıbesi úshin barsha telejýrnalıster atynan alǵys aıtty. Quttyqtaý sońy «Tumar» Ulttyq syılyǵyn saltanatty túrde tapsyrý rásimine ulasty.
Báıge qorytyndysy boıynsha, «Tumardyń» Qazaq televızııasynyń 60 jyldyǵyna arnalǵan arnaıy syılyǵymen «Televıdenıege qosqan úlesi úshin» atalymynda otandyq teleekrannyń erler arasynan shyqqan tuńǵysh dıktory, alǵashqy kommentator Sovet Masǵutov marapattaldy. Astananyń 20 jyldyǵyna oraı taǵaıyndalǵan «Astana týraly úzdik joba» atalymyna KazakhTV arnasynyń «Meniń Astanam» jobasy laıyq dep tanyldy. Sondaı-aq atalmysh arnanyń «Ult qazynasy» («Sokrovıshe nasıı») baǵdarlamasy – «Úzdik aǵartýshylyq baǵdarlama», «Na edıne s prırodoı» jobasynyń operatory Maksım Levıtın – «Úzdik operatorlyq jumys» atalymynda júldeger atandy. «567» kınokompanııasy» túsirgen rejısser Asqar Uzabaevtyń orys tilindegi «Tak moglo byt» derekti fılmi «Úzdik derekti kıno» atalymy boıynsha top jarsa, 31 arnanyń «Informbıýro» jańalyqtar toptamasy qatarynan 2 jyl boıy «Úzdik aqparattyq baǵdarlama» tuǵyrynan kórindi. Rejısser Qýanysh Orazalın – «Úzdik rejısserlik jumys», «Habar» arnasynyń jýrnalısi Asqar Nııazov – «Jyldyń úzdik telejýrnalısi» atalymdarynda «Tumar» taǵynyp, úzdik atandy. «Jetisý» arnasy «Úzdik aımaqtyq telearna» dep tańdalsa, «Astana» telearnasy túsirgen «Asyl arman» serıalynyń «Úzdik teleserıal» atalymynda baǵy jandy. «Tumardyń» bıylǵy qorytyndysy Qazaqstan Ulttyq arnasy ujymy úshin de tabysty boldy. Ulttyq arna úsh birdeı atalym boıynsha top jardy. Olar: «Men – Qazaqpyn!» baǵdarlamasy – «Úzdik oıyn-saýyqtyq joba», «Qareket» tok-shoýy – «Úzdik áleýmettik baǵdarlama» atansa, «Dara jol» baǵdarlamasynyń júrgizýshisi Dana Nurjigit «Úzdik telejúrgizýshi» dep tanyldy.
Al «Televızııalyq maýsymnyń úzdik oqıǵasy» atalymy boıynsha «Tumar» syılyǵy «Habar» arnasynyń «Ulttyq mýzykalyq júlde» jobasyna tabys etildi. Shyǵarmashylyq ujymǵa júldeni arnaıy tapsyrǵan Aqparat jáne kommýnıkasııalar mınıstri Dáýren Áskerbekuly: «Bizdiń búgingi jınalý sebebimiz – eń aldymen aqparat salasynyń ardagerlerine qurmet kórsetip, alǵys bildirý. Ekinshiden, «Tumar» Ulttyq syılyǵyn tabystaý arqyly telejýrnalısterdiń kásibı dárejesin kóterip, yntalandyrý. Qazaq kóz tımesin, súrinbesin degen nıette júırigine tumar taqqan. «Júırikke – tumar» degen jaqsy sóz osydan shyqqan. Biz de yrymnan attamaı, «televızııa salasynda júrgen júırikterimiz súrinbesin, árdaıym bıikten kórinsin» degen tilekte «Tumardy» taǵaıyndaǵan edik. Búgin aǵa býyn men jastardyń bas qosqan erekshe keshine kýá bolyp otyrmyz. Ardagerlerimizdiń uzaq jylǵy kásibı tájirıbesi men jastardyń boıyndaǵy otty jiger – otandyq televızııamyzdyń keleshegin kemel etetinine senimim zor», dep marapattaý keshin túıindedi.
Aıta keteıik, 2018 jyly «Tumar» Ulttyq syılyǵyna úmitker retinde barlyǵy 397 jumys kelip tústi. Sonyń arasynan qazylar alqasynyń sheshimimen Báıge erejesiniń talaptaryna sáıkes rásimdelgen 355 ótinim qaraýǵa qabyldandy. Joǵaryda atap ótkenimizdeı, 400-ge tarta jumystyń ishinen top jarǵan úzdik jobalar men jýrnalıster 14 atalym boıynsha «Tumar» syılyǵyna ıe boldy.
Nazerke JUMABAI,
«Egemen Qazaqstan»
Sýretterdi túsirgen Orynbaı BALMURAT,
«Egemen Qazaqstan»
