Sybaı­las jemqorlyqqa qarsy is-qımyl máseleleri jónindegi komıssııanyń otyrysy ótti

Jıynda 2015-2025 jyldarǵa arnalǵan Sy­baılas jemqorlyqqa qarsy strategııany júzege asyrý jónindegi 2015-2017 jyl­dardaǵy is-sharalar josparynyń oryndalý nátıjeleri, sondaı-aq memlekettik kiris organdaryndaǵy jemqorlyqqa qarsy áreket baǵytynda qabyldanyp jatqan sharalar qaraldy.

Otyrysty ashqan G.Ábdiqalyqova El­ba­sy Nursultan Nazarbaevtyń Qazaqstan hal­qyna arnaǵan «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynda jemqorlyqtyń aldyn alý kúresi jalǵasa beretini týraly aıtqan sózin atap ótti. Mem­lekettik organdardaǵy úderisterdi, sonyń ishinde olardyń halyqpen jáne bıznespen qarym-qatynasyn sıfrlandyrý mańyzdy bolyp sanalady.

«Jalpy alǵanda, qabyldanǵan sharalar Transparency International-dyń sybaılas jemqorlyqty qabyldaý ındeksinde Qazaq­stannyń toǵyzynshy orynǵa kóterilýine múmkindik beredi», dedi Memlekettik hatshy.

G.Ábdiqalyqovanyń aıtýynsha, ótken úsh jylda ákimshilik kedergilerdi aıtarlyqtaı azaıtýǵa, turmystyq sıpattaǵy sybaılas jemqorlyqty báseńdetýge, memlekettik organdar ashyqtyǵyn arttyrýǵa qol jetkizildi.

Sonymen qatar jıynda Memlekettik qyzmet isteri jáne sybaılas jemqorlyqqa qarsy is-qımyl jónindegi agenttik pen Qarjy mınıstrligi memlekettik kirister komıtetiniń baıandamalary tyńdaldy.

Sybaılas jemqorlyqqa qarsy strate­gııa­ny júzege asyrý baǵytyndaǵy 2015-2017 jyldardaǵy is-sharalar jospary bo­ıynsha 63 is-shara atqaryldy. Sonyń ishinde 4 jańa zań, 20 normatıvtik-quqyqtyq akt ázirlenip, 8 aqparattyq júıe iske qosyldy. Budan bólek, 36 uıymdastyrý is-sharasy ótkizildi. Qazaqstannyń 2025 jylǵa deıingi damýynyń strategııalyq jospary eskerile otyryp ázirlengen Sybaılas jemqorlyqqa qarsy strategııany júzege asyrý baǵytyndaǵy 2018-2020 jyldarǵa arnalǵan is-sharalar jospary bekitilý kezeńinde.

Komıssııa otyrysynyń qorytyn­dy­synda Memlekettik kirister komıtetiniń ishki qaýipsizdik bólimsheleriniń jumy­syn jandandyrý, qaraýyndaǵy qyzmet­ker­leriniń jemqorlyq sıpatyndaǵy quqyq buzýshylyǵy úshin basshylardyń jaýap­ker­shiligin arttyrý, jemqorlyq qaterin azaıtý úshin sıfrly tehnologııalardy engizý jóninde tapsyrmalar berildi. 

Abaı ASANKELDIULY,

«Egemen Qazaqstan»