- Prezıdent Nursultan Nazarbaevtyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýynda adamı kapıtal sapasyn jaqsartý – negizgi mindetterdiń biri. Sondyqtan densaýlyq saqtaýǵa, salaýatty ómir saltyn nasıhattaýǵa jáne jastardyń reprodýksııalyq densaýlyǵyn qorǵaýǵa, nyǵaıtýǵa erekshe nazar aýdarý qajet. 2017 jyly Mańǵystaýda 7 iri sport nysany salyndy. Bul «Mańǵystaý arena» sport klýby, «Batyr» sport kesheni (34 sh/a), «Melovoı» sport kesheni (3«b» sh/a), «Lions Fight Club» jekpe-jek óneri akademııasy. Nátıjesinde 246 jumys orny ashyldy. Sondaı-aq, Shetpe, Atameken jáne Aqshuqyrda sporttyq keshender salynýda. 32 shaǵyn aýdannan 1,5 gektardan asatyn muz saraıy boı kótermek. 2500 oryndyq keshen halyqaralyq standarttarǵa saı muz alańyn, fıtnes zal, konferens-zal, baspasóz ortalyǵy, kafe jáne meıramhanany qamtıdy. Barlyǵy 120-dan astam jańa jumys orny qurylady, dedi oblys ákimi Eraly Toǵjanov jıynda.
Mańǵystaý oblystyq dene shynyqtyrý jáne sport basqarmasynyń málimetine súıensek, búgingi kúni oblysta sportpen shuǵyldanatyn adamdardyń sany 30% -ǵa nemese 194 832 adamǵa jetti. Bul kórsetkish respýblıkada 5-oryn alady. Oblystaǵy 125 888 orta mekteptegi oqýshynyń 21 442-si sportpen shuǵyldanady. 2017 jyldyń qorytyndysy boıynsha oblysta ulttyq sport túrlerimen aınalysatyndar sany 12 659 adamdy qurady. Oblysta 19 ulttyq sport túri bar. Sondaı-aq 2018 jyly 54 iri sporttyq is-shara ótkizý josparlanyp otyr.
-Qazirgi kezde oblysta 624 sporttyq nysan bar. 2017 jyly ınvestorlar qarajatymen 20-dan astam sport alańy jáne 8 sporttyq nysan salyndy. 2018 jyly MJÁ mehanızmi arqyly sporttyq zaldardyń qurylysy, 17 shaǵyn aýdandaǵy ústel tennısi ortalyǵy, 26- yqshamaýdandaǵy sport bazasy, Qyzan aýylyndaǵy sport kesheni, boks ortalyǵynyń qurylystary bastalady, dedi Mańǵystaý oblystyq dene shynyqtyrý jáne sport basqarmasynyń basshysy Bekbolat Baıjanov.
Jıynda sport alańdary men balalarǵa arnalǵan zaldardyń sanyn kóbeıtý, Aqtaý qalasynda salynyp jatqan árbir jańa turǵyn úı kesheninde sport seksııalary men seksııalardy uıymdastyrý úshin alańdar bólý máselesi qaraldy. Sonymen qatar, oblys ákimi barlyq iri kásiporyndardyń basshylaryna jumysshylar men jaqyn mańdaǵy shaǵyn aýdandardyń turǵyndary úshin kompanııa aýmaǵynda sporttyq alańdar men zaldar salýdy tapsyrdy.
Gúlaıym ShYNTEMIRQYZY,
«Egemen Qazaqstan».
Mańǵystaý oblysy
