Qazaqstan Prezıdentiniń "Bes áleýmettik bastamasyn" iske asyrý taqyryby talqylanǵan dóńgelek ústelde Investısııalar jáne damý mınıstrliginiń Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov jańa «7-20-25» baǵdarlamasynyń artyqshylyqtaryn mysaldarmen keltirip, aıtyp berdi.
«Mysaly, páter 12 mıllıon teńge turatyn bolsa, onyń aldyn ala tólemin (20 paıyz) tóleý úshin 2,4 mıllıon teńge qajet bolady, al qalǵan 9,6 mıllıon teńgeni bank 25 jylǵa 7 paıyzben beredi. Sóıtip, aı saıynǵy tólemniń kólemi 68 myń teńge bolady», dedi Marhabat Jaıymbetov.
Ulttyq bank tóraǵasynyń orynbasary Oleg Smolıakovtyń aıtýynsha, ekinshi deńgeıli bankterdiń barlyǵy bul jobaǵa qatysatyn bolady.
Buǵan deıin Elbasy Nursultan Nazarbaev Parlament palatalarynyń birlesken otyrysynda «7-20-25» atty jańa baǵdarlamany usynǵan bolatyn. Bul baǵdarlama kez kelgen qazaqstandyqtyń nesıege páter alýyna múmkindik beredi. «7-20-25» ıpotekalyq kredıt berý baǵdarlamasy bıyl mamyrda bekitiledi dep josparlanyp otyr.
