Foto: Oksana SOSNOVSKAIа
Oblystyq Tótenshe jaǵdaılar departamenti baspasóz qyzmetiniń taratqan málimetterine súıensek, 31 naýryz kúni Zyrıan aýdanynyń 9 birdeı (Zýbovsk, Solovevo, Turǵysyn, Pervorossııskoe, Maleevsk, Chapaev, Snegırevo, Krestovka, Parygıno) aýyly men Zyrıan qalasyndaǵy sý basqan úılerden 400-ge jýyq adam qaýipsiz jerge kóshirilgen. Turǵyndardyń kópshiligi týystarynyń úıinde qalýdy jón kórse, 70 adam evakýasııa beketinue ornalastyrylypty. Al naýryz aıynyń sońǵy kúni aýdan ortalyǵyndaǵy 105 úıdi sý alyp, 200-ge jýyq turǵyn qaýipsiz jerge kóshirilgen. Búgin Zyrıan aýdanynyń ákimi Nurjan Toqseıitovpen telefon arqyly sóıleskenimizde aýdanda 167 úıdi sý basqanyn, 133 turǵyn kóshirilip, onyń 87-si týystarynyń úıine, qalǵany evakýasııalyq beketke ornalastyrylyp, ystyq tamaqpen qamtamasyz etilgenin jetkizdi.
31 naýryz kúni Kókpekti aýdanynyń Samar aýylyna dambydan qaýip tónip, 200 adam qaýipsiz jerge kóshiriletini habarlanǵan edi. Alaıda 1 sáýir kúni Kókpekti aýdandyq tótenshe jaǵdaılar jáne jedel daıyndyq bóliminiń basshysy Qýanysh Ankebaevpen baılanysqa shyqqanymyzda 31 naýryzda Samardan tek 90-nan astam turǵyndar kóshirilgenin, qazirgi ýaqytta olar úılerine orala bastaǵanyn, dambydaǵy sý deńgeıi de birshama túskenin habarlady.
Qazirgi ýaqytta tek Semeı men Zyrıan ǵana emes, Katonqaraǵaı, Kókpekti, Shemonaıha aýdandary da aıtyp kelmeıtin apatty aýyzdyqtaýmen aınalysyp jatqany belgili. «31 naýryz kúni bir táýlikte oblysta 263 úıdiń sýy soryldy. Tasqyn zardaptaryn joıý jumystarymen 1 myńǵa jýyq adam shuǵyldanyp jatyr. Ishki ister mınıstrligi Tótenshe jaǵdaılar komıteti men ózimizdiń óńirdiń qutqarýshylarynan bólek Almaty qalasy, Almaty, Pavlodar jáne Ońtústik Qazaqstan oblystarynan kómekke kelgen áriptesterimiz apattyq-qutqarý jumystarymen aınalysýda», - deıdi departamenttiń baspasóz qyzmetiniń mamany Anastasııa Sklıar.
Azamat QASYM,
«Egemen Qazaqstan»
Shyǵys Qazaqstan oblysy
