Qazaqstannyń Qyrǵyzstandaǵy elshisimen suhbattasý kezinde Qyrǵyz Respýblıkasynyń Prezıdenti qysqa mezgil aralyǵynda Astanaǵa eki ret resmı saparmen, sonymen qatar úshinshi ret Ortalyq Azııa memleketteri basshylarynyń keńesine barǵanyn eske aldy.
«Bul saparlarymnyń kezinde biz mańyzdy qujattarǵa qol qoıdyq, kókeıkesti máselelerdi talqyladyq. Men sizdiń Qyrǵyzstanǵa elshi bolyp taǵaıyndalǵanyńyzǵa óte qýanyshtymyn, bolashaqta bizdiń mámilelerimiz tereńdeý ústinde ǵana bolady dep senemin, óıtkeni qyrǵyz ben qazaqtan jaqyn halyq joq», – dedi Sooronbaı Jeenbekov.
Úsh kezdesýdiń de tarıhı oqıǵa ekenin aıtqan Qazaqstannyń elshisi Kárim Kókirekbaev kezdesýlerde shekara, ekonomıkalyq yqpaldastyq máseleleri oń sheshilip, osynyń nátıjesinde eki eldiń ortasyndaǵy taýar aınalymynyń edáýir óskendigin, bıyl Qyrǵyzstanda ótkeli jatqan zańǵar jazýshy Shyńǵys Aıtmatovtyń 90 jyldyq merekesi jáne III Búkilálemdik kóshpendiler oıyndary is-sharalaryna Qazaqstan qyzyǵýshylyq tanytyp otyrǵanyn málimdedi.
Nazarbek BAIJIGITOV,
Úkimettik «Kyrgyz Týýsý» gazetiniń jaýapty hatshysy,
arnaıy «Egemen Qazaqstan» úshin
