Úsh oblystaǵy túıe sany shashamen 70 myńnan asatynyn eskergen Ońtústik Qazaqstan oblysynyń ákimi Janseıit Túımebaev tyǵyz baılanys ornatyp, tıisti basqarma basshylaryna óńirimizdegi túıe sharýashylyǵyn damytý maqsatynda naqty tapsyrmalar júktedi.
О́ıtkeni óńirde salynyp jatqan zaýyt túıe sútimen tolyq qamtamasyz etilýi tıis. Bul oraıda aýdan, qalalarda túıe sútin jınaıtyn pýnktter ashý da mańyzdy. Eki jyl buryn elimizde tirkelgen Golden Camel Group LTD kompanııasy qýattylyǵy táýligine 100 tonna sút óńdeıtin óndiristiń qurylysyn bastaǵan edi. Quny 7,5 mlrd. teńge bolatyn zaýyttyń jylyna 2500 tonna qurǵaq sút óndiretini josparlanǵany jáne ınvestısııalyq joba iske qosylǵanda 150-den astam azamat jumyspen qamtylatyny aıtylǵan-dy. Zaýytta ázirlengen daıyn ónimderdiń respýblıka naryǵynan bólek, Qytaı, Saýd Arabııa, Gonkong elderine eksporttalatynan da jurt habardar.
О́ńirlik ınvestısııalyq keńestiń otyrysynda oblys ákimine zaýyttyń qurylysy jóninde málimet bergen «Golden Camel Group Ltd» kompanııasynyń basshysy Lı Hýeı jaqyn arada 30-ǵa jýyq jergilikti turǵyndardy jumysqa qabyldaıtynyn jetkizdi. Al Janseıit Qanseıituly qurǵaq shubat óndiretin kásiporynǵa qajetti túıe sútiniń kólemine alańdaýshylyq bildirdi. Bul oraıda ózge oblystardan da sút qabyldaýdy oń jolǵa qoıý qajet. Sondaı-aq, ınvestısııalyq keńeste oblys ákimi Elbasy men Úkimettiń tapsyrmalaryn ýaqytyly jáne tıisti deńgeıde oryndaý – basym baǵyt bolýy, óńirge ınvestorlardy tartý men ınvestısııalyq ahýaldy jaqsartý maqsatynda qurylǵan óńirlik keńestiń jumysyn odan ári jandandyrý qajettigin aıtty. «Kazakh Invest» aksıonerlik qoǵamynyń óńirlik fılalynyń jumysyn kúsheıtýdi tapsyrdy.
Keńes barysynda «Asia Trafo», «Gold Aluminum», «Green Technology», «Golden Camel Group Ltd» kompanııalary basshylarynyń ótinish-tilekteri tyńdaldy. Mysaly, «Asia Trafo» JShS dırektory Serǵazy Kúntýarov elektr men gaz qajettigin jetkizse, «Green Technology» Jeńisbaı Sultanov qondyrǵylardy iske qosýǵa keletin sheteldik mamandardyń vıza máselesin kóterdi.
Erkin DOSYMBAI,
Ońtústik Qazaqstan oblysy
