Bul oraıda shahar sheńberinde túrli jobalar qolǵa alynyp, jemisti júzege asýda. Ásirese shahar turǵyndary men qonaqtary úshin saıabaqtardy qaıta jańǵyrtý, kóshelerdi abattandyrý sııaqty máseleler sheshimin tabýda.
Alaıda búginde qalany jaryqtandyrý, jol belgileri men baǵdarshamdar ornalastyrý máselesi mańyzdy bolyp otyr. Máselen, qazirde Taraz qalasyndaǵy 14 kóshe men 84 kóshe qıylysyndaǵy baǵanalardyń tozyǵy jetip tur.
Sonymen qatar oblys ortalyǵyndaǵy Jambyl dańǵylynyń boıynda ornalasqan 68 baǵdarshamdy da aýystyrý qajet. Jumysty júzege asyrý úshin bul maqsatqa 19 mıllıon teńge qarajat qarastyrylady.
Jambyl oblysynyń ákimi Asqar Myrzahmetov shahar kólemindegi baǵanalar jaıyn, qala kóshelerindegi jarnama taqtaıshalar men bılbordtardyń ahýalyn synǵa alǵan bolatyn. Ákimniń bul synyna oraı tıisti memlekettik mekemelerdiń basshylary da qala kelbetin arttyrýda jumys istep otyrǵanyn aıtqan. Al Taraz qalasynyń ákimi Rústem Dáýlet qaladaǵy baǵdarshamdardy azaıtyp, kedergisiz kólik aǵynyn qamtamasyz etý maqsatynda birqatar jumys atqarylyp jatqanyn málimdedi.
Aldaǵy ýaqyttarda kóne shahardyń ortalyq kósheleri ıntellektýaldy jaıaý júrginshiler ótkelimen jabdyqtalyp, buqaralyq aqparat quraldary men áleýmettik jeli arqyly kólik júrgizýshilerdiń kólik aǵynyn azaıtýǵa qatysty usynystaryna kóńil bólinedi. Sonymen qatar qala kóshelerindegi jarnamalardy ornalastyrý isindegi júıesizdikterdi retteýmen aınalysatyn arnaıy qurylym paıda bolýy múmkin. Eger paıda bolǵan jaǵdaıda, atalǵan mekeme jarnamany talapqa saı ornalastyrýǵa, biryńǵaı dızaınmen árleýge basymdyq beredi. Bul óz kezeginde shahar kórkin keltirýmen qatar, kóne qalanyń dáýletine sáýleti saı kelbetin qalyptastyrmaq.
Hamıt ESAMAN,
«Egemen Qazaqstan»
Jambyl oblysy
