Seısenbi kúnge deıin Shymkent qalalyq juqpaly aýrýlar aýrýhanasyna jiti ishek ınfeksııasymen 188 adam túsken. Olardyń 101-i eresek, 39-y balalar bolsa, 48-i jasóspirim. Al 3 sáýirde naýqastardyń 99-y úılerine qaıtarylǵan. Qalǵan naýqastardyń jaǵdaılary orta dárejede. Aldaǵy kúnderi taǵy 50-60 naýqas aýrýhanadan shyǵarylmaq. Bul derekterdi Ońtústik Qazaqstan oblystyq densaýlyq saqtaý basqarmasynyń basshysy Muqan Egizbaev arnaıy brıfıngte málim etti. Basqarma basshysynyń aıtýynsha, der kezinde dárigerlerdiń kómegine júgingen naýqastar basym. Degenmen úıde ózinshe emdelgeninen nátıje shyqpaı dárigerge kesh kelgender de az emes.
Shymkent qalasy turǵyndarynyń ýlanýyna, budan buryn habarlaǵanymyzdaı, «Iýjnoe» dámhanasyna qarasty dúńgirshekten satylǵan quımaly balmuzdaq sebepker bolyp otyr. Densaýlyq saqtaý mınıstrligi Qoǵamdyq densaýlyq saqtaý komıteti OQO departamentiniń basshysy Nurbek Nyshanovtyń málimdeýinshe, atalmysh dámhanaǵa jospardan tys tekserý júrgizilgen. Satylyp jatqan ónimderdiń synamalary, jabdyqtardyń súrtindileri alynyp, birqatar kemshilikter anyqtalǵan. «Balmuzdaq kıoskisi eleýsiz nysan retinde sanalady. Iаǵnı josparly tekserýge jatpaıdy. Biraq balmuzdaq dúńgirsheginiń ıesi nysandy iske qosar aldynda jergilikti basqarmalarǵa habarlama berýi tıis edi. Ol habarlama bermegen. Sondyqtan qyzmetkerleri, nysan tekserilmegen. Qazir osyǵan baılanysty ákimshilik is qozǵaldy. Dúńgirshek jumysy sot sheshimi shyqqansha toqtatyldy. Osy oqıǵadan keıin balmuzdaq, tez buzylatyn ónimder satatyn saýda oryndarymen tıisti jumystar oblys boıynsha júrgizilýde», dedi N.Nyshanov. Tutynýshylaryn tósekke tańǵan balmuzdaq úıde daıyndalǵan eken. Departament basshysynyń aıtýynsha, úıde daıyndalǵan ónim polıetılen ydyspen jáne jeke kólikpen tasymaldanǵan. Iаǵnı eshqandaı talap saqtalmaǵan. Sondaı-aq balmuzdaq satatyn nysandaǵy 5 qyzmetkerdiń bireýiniń ǵana medısınalyq kitapshasy bar. Qysqasy, kásipker óz isine jaýapsyz jáne salǵyrt qaraǵan. Bul oraıda OQO kásipkerler palatasynyń dırektory Asqar Ábýbákirov qoǵamdyq tekserýdi kúsheıtý qajet dep esepteıdi.
Al Ońtústikte balmuzdaqtan ýlanǵan adamdardyń jaǵdaıyna qatysty pikir bildirgen Densaýlyq saqtaý mınıstrligi Qoǵamdyq densaýlyq saqtaý komıtetiniń tóraǵasy Jandarbek Bekshın shaǵyn jáne orta bıznes nysandary aıtarlyqtaı emes epıdemıologııalyq mańyzdaǵy oryndarǵa jatatynyn, olar tek halyqtyń shaǵymy túsken ýaqytta nemese qandaı da bir tótenshe jaǵdaılar týyndaǵanda ǵana tekseriletinin aıtyp ótti. Aldaǵy ýaqytta elimizdegi jumsaq balmuzdaq satatyn barlyq nysandar tekseriletin bolady. «Birinshiden, bul núkte jabyldy. Ekinshiden, materıaldar tergeý organdaryna tapsyrylyp, Ońtústik Qazaqstan oblysynyń ishki ister basqarmasy tekseris aıaqtalǵannan keıin osy oryndy ashyp, sapasyz ónimdi satqan jeke kásipker Eshmuratovtyń kinási qanshalyqty ekenin anyqtaıtyn bolady», dedi J.Bekshın jýrnalısterge bergen suhbatynda.
Aıta ketelik, Ońtústik Qazaqstan oblysynyń ákimi Janseıit Túımebaev aýrýhanaǵa baryp, jiti ishek ınfeksııasymen túsken naýqastardyń jaǵdaıyn bilgen bolatyn. Odan keıin jedel shtab otyrysyn ótkizgen oblys ákiminiń tapsyrmasymen arnaıy jumys toby qurylyp, qyzmettik tekserý sharalary júrgizilýde. Sondaı-aq shtab otyrysynda bolǵan oqıǵanyń sebep-saldary talqylandy. Mamandardyń aıtýynsha, jiti ishek ınfeksııasy sanıtarlyq epıdemıologııalyq talaptardyń saqtalmaýynan bolǵan.
Ǵalymjan Elshibaı,
«Egemen Qazaqstan»
Shymkent
