Is-sharaǵa Aýyl sharýashylyǵy mınıstrligi Veterınarlyq baqylaý jáne qadaǵalaý komıteti tóraǵasynyń mindetin atqarýshy Tursyn Qabýldanov qatysyp, mınıstrlik Memleket basshysynyń tapsyrmasyn oryndaý aıasynda otandyq ónimderdi ilgeriletý jáne taýarlar-
dy halyqaralyq naryqtarǵa shyǵarý maqsatynda strategııalyq izdeý jumystaryn jalǵastyryp otyrǵanyn jetkizdi.
«Aýyl sharýashylyǵy mınıstrligi mal sharýashylyǵy ónimderin eksportqa shyǵarý baǵytynda keshendi jumystar atqarýda. Onyń ishinde kórshiles Qytaı eline eksportqa shyǵarý máseleleri qarastyrylýda. Qytaı Halyq Respýblıkasynyń sapa baqylaý jáne karantın basqarmasynyń saıtynda Qazaqstannyń 9 oblysynan QHR-ǵa muzdatylǵan qoı etin ımporttaýǵa resmı sheshim qabyldanǵan aqparat shyqty. QHR-dan 2017 jyly Qazaqstannyń 5 kásiporny ınspeksııa jasalyp, tekserilip, olar Qytaı Halyq Respýblıkasynyń reestrine engizilgen. Búgingi kúni Qazaqstannyń 9 oblysynan 5 kásiporyn arqyly Qytaıǵa qoıdyń muzdatylǵan etin eksporttaýǵa jol ashyldy», dedi T.Qabýldanov.
Qytaı Halyq Respýblıkasyna muzdatylǵan qoı etin eksporttaıtyn 9 oblystyń ishinde Qaraǵandy, Batys Qazaqstan, Aqtóbe, Atyraý, Pavlodar, Qostanaı oblystary bar. Atalǵan aımaqtar aýsyl aýrýlaryna qarsy vaksına egilmeıtin taza óńirler bolyp sanalady.
«Sonymen qatar Iran elimen de hattama toltyrylǵan. Veterınarlyq sertıfıkattary kelisilgen. Byltyr ol elge 4800 bas qoı tirideı jóneltildi. Jáne Saýd Arabııasymen de kelisim sharalary júrgizilip, ótken jyly Birikken Arab Ámirlikterine 3400 bas qoı tirideı eksporttaldy. Onyń syrtynda osy elge sıyr men qoı eti de jóneltildi. Sondaı-aq Qytaı eline birinshi ret 2017 jyldyń jeltoqsan aıynda 153 bas asyl tuqymdy qoldanysta bolatyn jylqylar tirideı eksporttaldy», dedi komıtet tóraǵasy.
Raýan QAIDAR,
«Egemen Qazaqstan»
