Ásirese qanatqaqty jobalar negizinde qolǵa alynǵan mektep muǵalimderiniń biliktiligin arttyrý máselesine aıryqsha kóńil bólinýde. Jańa júıeniń jetken jetistigi men áli de aqsap jatqan tustaryn saralaǵan mamandar Almatydaǵy Sh.Ýálıhanov atyndaǵy №12 mektep-gımnazııasynda «Fızıka», «Hımııa», «Bıologııa» pánderi boıynsha aǵylshyn tilinde ázirlengen oqý-ádistemelik keshenderdi bilim berý úrdisine sátti engizý» atty halyqaralyq ǵylymı-praktıkalyq semınarda bas qosty.
Qatysýshylar jańartylǵan bilim berý mazmunyn engizý aıasynda XXI ǵasyr oqýshysynyń daǵdylaryn damytý, aǵylshyn tilin jetik biletin bilikti pán muǵalimderin daıarlaý syndy ózekti máselelerdi talqylady. Elimizdiń ár óńirinen kelgen bilikti ustazdar fızıka, hımııa, bıologııa pánderi boıynsha aǵylshyn tilinde kórnekti sabaqtar ótkizdi. Jańartylǵan bilim mazmunyna sáıkes ǵylymı baǵyttaǵy pánderdi aǵylshyn tilinde oqytýdyń ádistemelik bazasyn ári qaraı jetildirý boıynsha usynystar aıtyldy. Semınar jumysyna arnaıy kelgen Express Publishing baspasynyń CLIL ádistemesiniń keńesshi-sarapshysy, Kembrıdj ýnıversıtetiniń halyqaralyq emtıhan keńesiniń sarapshysy Bob Obıdyń sózinshe, aǵylshyn tilin úıretýdi pándik bilim berý barysynda qoldanýdyń tıimdi tustary kóp. «Men oqýshylarǵa til úıretýge arnalǵan kóptegen metodıkalyq kitaptar jazdym.
Muǵalimdermen pikir almasyp, tildi tez ári jeńil úırenýge qatysty óz tájirıbemmen bólistim. Men úıretken oqý baǵdarlamasy boıynsha mektep oqytýshylary aǵylshyn tilin meńgerýdiń V1 deńgeıine jetýi tıis. Fransııa, Ispanııa, Italııa sııaqty kóptegen elderdiń muǵalimderi de osy deńgeıdi meńgergen. V1 deńgeıi aǵylshyn tilinde anyq sóıleý arqyly jeke pánderdi ıgerýge tolyqtaı jetkilikti», deıdi ol. Elimizdegi Nazarbaev zııatkerlik mektepteriniń baǵdarlamalaryn ázirlegen maman óz sózinde qazaqstandyq muǵalimderdiń ishinde, ásirese jas mamandardyń til ıgerýge degen talpynysy joǵary ekenin aıtady. Shara aıasynda jeke pánder boıynsha zerthanalarǵa bólingen bilikti muǵalimder oqytýdyń ınteraktıvti ádisterin paıdalana otyryp, óz bilim-biligin ortaǵa saldy.
Almaty qalalyq bilim basqarmasy mamandarynyń aıtýynsha, aǵymdaǵy jyldyń qazan aıynda qala mektepteri arasynda «Jeti jurttyń tilin bil» atty baıqaý uıymdastyrylady. Baıqaýǵa ár mektepten joǵary synypta oqıtyn bir oqýshy ǵana qatysa alady. Konkýrs nátıjesinde naǵyz myqtylar saralanyp, úsh tildi jetik meńgergen shákirtter anyqtalmaq. Bul joba mektep oqýshylarynyń til ıgerýge degen qulshynysyn arttyrýǵa baǵyttalǵan.
– О́tken jyldyń qyrkúıek aıynan bastap birqatar qala mektepterinde fızıka, hımııa, ınformatıka, bıologııa pánderi aǵylshyn tilinde júrgizilip keledi. Onyń nátıjesi qandaı, problemalaryn qalaı sheshý kerek degen saýaldarǵa jaýap alý úshin, sondaı-aq osy ýaqytqa deıin ótkizilgen is-sharalardyń nátıjesin qorytyndylap, tájirıbe almasý maqsatynda jınalyp otyrmyz. Almaty qalasynda barlyǵy 202 mektep bolsa, onyń 27-si osy qanatqaqty jobaǵa kirip otyr. Keıbir mektepterde tek fızıka nemese hımııa pánderi, al keıbir oqý oshaqtarynda barlyq segizinshi synyptar jobaǵa kirgen. О́tkizilgen semınarlar men muǵalimderdiń sabaqtaryna qatysý nátıjesin saralaı kele, úshtildilik boıynsha osy pánderdi aǵylshyn tilinde joǵary synyptarda da júrgizýge bolatynyna kóz jetkizdik. Balalar tildi tek qural retinde qoldanady degen qorytyndyǵa keldik. Ázirge nátıje jaman emes. Bul baǵyttaǵy jumystar aldaǵy ýaqytta da jalǵasyn tabatyn bolady, – deıdi Almaty qalalyq bilim basqarmasynyń orta bilim bóliminiń bas mamany Qarlyǵash Ábdimanapova.
Semınar Bilim jáne ǵylym mınıstrligi men «EduStream» bilim berý kompanııasy jáne Express Publishing baspasynyń qoldaýymen uıymdastyryldy. Atalǵan is-shara ustazdar qaýymy úshin tájirıbe almasýdyń ozyq alańyna aınaldy deýge bolady.
Arman OKTIаBR,
«Egemen Qazaqstan»
ALMATY
