Senatorlar sapar baǵdarlamasy boıynsha «Kazakhmys Stelting» jaýapkershiligi shekteýli seriktestiginde eńbek ujymymen kezdesti. Balqash óndiris alańdarynda barlyq qosalqy kásiporyndardy qosqanda 10 myńǵa jýyq adam eńbek etedi. Depýtattar jumysshylardyń ortasha eńbekaqysyna, óndiris jaǵdaıyna, tehnıkalyq qaýipsizdik jáne ózekti máselelerdiń bolýyna nazar aýdardy. Kásiporynnyń tehnıkalyq dırektory Gýlamıdın Kamırdınov bıyl 30 myń teńgege kóterilip, 170 myńǵa jetkenin habarlady.
Kezdesý barysynda Prezıdenttiń elimizdi gazdandyrý jónindegi besinshi bastamasy erekshe yqylas týǵyzdy. Kásiporyn ókilderiniń pikirinshe, kómir men mazýttan bas tartý jáne gazben qamtamasyz etýge kóshý ekonomıkalyq kórsetkishterdi ǵana emes, aımaqtaǵy ekologııalyq jaǵdaıdy da jaqsartatyn bolady. Senatordyń aıtýynsha, bul másele oblystyq deńgeıde sheshiletin bolady. Parlament depýtattary kúkirt qyshqyldy mys balqytý óndirisinde de boldy.
R.Ábdikerov pen M.Taǵymov №15 mektep-lıseıde oqý oryndarynyń basshylarymen jáne Balqashtaǵy stýdent jastarmen kezdesti.
- Prezıdenttiń bes áleýmettik bastamasy qazaqstandyqtardyń ómir deńgeıin jaqsartýǵa baǵyttalǵan. Biz osy qujattyń mańyzdylyǵy men ózektiligin aıtýǵa keldik, - dedi Rysqalı Ábdikerov.
Senatorlar árkimniń kásibin ashýdaǵy tetikter, tıimdi ıpoteka sharttary, eldi mekenderdi gazdandyrý, salyqty tómendetý týraly aıta kelip, otandyq naryqta qandaı mamandyqtar qajet ekenine toqtaldy.
Qala ákimi Aleksandr Aglıýlın kezdesýge qatysqan senatorlarǵa alǵys aıta kelip, balqashtyqtar Elbasynyń úndeýinde aıtylǵan barlyq baǵyttardy josparly túrde jáne tolyqtaı iske asyrýǵa bar kúshin salatynyn aıtty.
Depýtattarǵa Balqash qalasynyń jaǵdaıyn jaqsartýǵa arnalǵan birqatar usynystar aıtyldy. Atap aıtqanda, tazalaý qurylystaryn salý men turmystyq qatty qaldyqtardyń jańa polıgonyn belgileý, Saıaq aýylyn sapaly aýyz sýmen qamtamasyz etý, Balqashtan Qaraǵandyǵa, Astanaǵa, Almatyǵa jáne basqa da qalalarǵa júıeli áýe qatynasyn sýbsıdııalaý máseleleri qozǵaldy. Senatorlar odan keıin Saryshaǵan aýyly men Prıozersk qalasyna bardy.
