- Bizdiń qurama komanda osy matchta favorıt ekeni ras. Biraq, tyńǵylyqty daıyndalmasa bolmaıdy. Qazaqstan osyǵan deıin azýly komandalardy jeńip ketken. Degenmen, bizdiń ujymnyń Marın Chılıch sekildi tennısshi bar. Onyń quramaǵa kelip, kómektesip jatqany qýantady. Áıtpese onyń jarystary kóp, qoly bosamaıdy.
- Al Qazaqstan quramasy jaıly qandaı oıdasyz? Onyń qandaı erekshe tustary bar?
- Bul komanda kóp jaǵdaıda óz alańynda myqty oınaıdy. Astanadaǵy matchtardyń kóbisinde jeńiske jetken. Al bul jolǵy oıyn bizdiń alańymyzda ótedi. Sebebi, Horvatııanyń reıtıngisi Qazaqstannan joǵary. Áıtpese, oıyn Qazaqstan alańynda ótkende bizde kóptegen qıyndyqtar bolar edi. Onda ózimizdi favorıt sanamaıtyn edik. Al bul joly tósenishti de ózimiz tańdap otyrmyz, ári Chılıchte oınaımyn dep qulshynyp tur.
- «Devıs kýbogynyń» ótý ádisi aýysatynǵa uqsaıdy. Tamyz aıynda daýysqa salynady. Eger, bir aptada Álem chempıonaty sekildi ótetin bolsa, Siz qýanasyz ba? Álde bul Horvatııa úshin yńǵaısyz ba?
- Ázirge solaı bola ma, bolmaı ma, bilmeımiz. Bul jarnama men marketıng jaǵynan paıdaly. Bir jerde ótetini qarjy turǵysynan Halyqaralyq federasııaǵa da tıimdi. Tennıs álemindegi tanymal tennısshilerdi bir jerge jınap, ózge de sporttardaǵydaı úlken toı jasaýdyń múmkindigi. Alaıda, bul jaǵdaı tennısshiler úshin qalaı bolaryn ázirge bilmeımin. Biz bir oıyndy óz alańymyzda, bir oıyndy syrtta ótkizip, sol matchtardyń ortasynda 2-3 aılap daıyndalyp, asyqpaı saraptama jasaýǵa úırenisip qalǵanbyz.
Ermuhamed Máýlen,
«Egemen Qazaqstan»
Varajdın, Horvatııa.
