Qazaqstan • 12 Sáýir, 2018

Eýropadaǵy qazy satatyn qazaq

314 ret kórsetildi

Sizdi qazy satady dep estidim, kelisi qanshadan» dep WhatsApp jelisinen hat jazyp jiberdim. Azdan soń baılanysqa shyqqan ol barmaq eli qazy 15 eýrodan bastalyp, 20 eýroǵa deıin jetetinin aıtyp jaýap berdi. Osylaısha jón surasa kele, ózin Saǵynǵalı Mamaev dep tanystyrǵan jigitimizdiń Belgııada turatynyn, arasynda qazy satyp, qosymsha tabys tabatynynan habardar boldyq. Qazir Brıýsselde jumysshylarǵa kıim tigetin ortalyqta tapsyrystardy qabyldap, jetkizip berýmen aınalysady. Qazy satyp baıyp ketpese de, toı-tomalaq jasaǵan Eýropadaǵy qazaqtar osy Saǵynǵalıǵa tapsyrys berip, qazyny kertip jep otyr.

Bizdiń bilýimizshe, Eýropa halqy jylqy etin asa jeı qoımaıdy, osy sebepti de iri qaranyń etin tabý da ońaı emes. Qımyldaǵan qyr asady demekshi, Saǵynǵalı jylqy etin sharq uryp jarty jyl izdegen kórinedi. «Jylqy etin, onda da semizin tabý óte qıyn boldy. Belgııada tamaq óndirisinde jylqy ishegin paıdalanýǵa tyıym salynǵan. Osynyń barlyǵyn izdep tabý úshin ǵana alty-jeti aı ýaqyt ketti. Jylqy soıatyn qasaphanany taýyp kelistim, qazir ne kerek barlyǵyn tapsyryspen aldyrtamyn», deıdi ol.

Qazy satamyn degen oı Saǵynǵalıǵa buryn-sońdy úsh uıyqtasa túsine kirmegen nárse. Almatyda týyp-ósken ol qaladaǵy joǵary oqý oryndarynyń birinde zańger mamandyǵynda oqyp, bilim alady. Keıin 2012 jyly Belgııada bıznes salasynda oqýyn jalǵastyryp, jumys isteýge Brıýsselde qalǵan.

– О́mirimde qazy aınaldyramyn, ony satamyn dep eshqashan oılamappyn. Jyraqta júrip elge degen saǵynyshtan qazy aınaldyryp kettim. Áıtpese kádimgi qazaq otbasynda tárbıe alǵan men osyǵan deıin qazan-oshaqqa aralasyp kórmegem. Sóıtsem qıyn eshteńesi joq eken. Ájemnen bir, sheshemnen bir surap júrip, óz resebimdi jasap aldym,– dep eske aldy ol.

Osydan soń Saǵıdyń úıinen dám tatqan tanys-bilisteri qazy aınaldyryp ber dep qolqalasa kerek. Aldymen úı-ishine, dostaryna tartý etken, artynsha uzynqulaqtan estigen qazaqtardan bólek qyrǵyzdar, ózbekter, uıǵyrlar, orystar tapsyrys bere bastaǵan. Bir sózben aıtqanda Ortalyq Azııada týyp-ósip, elinen jyraqta júrgender Saǵynǵalıdyń qazysyn jep, saǵynyshyn basatyn bolǵan.

– Belgııaǵa qaraǵanda Germanııadaǵylar kóp surap jatady. Byltyr Nıýrnbergte Eýropa qazaqtary Naýryz toılaǵanda maǵan tapsyrys bergen bolatyn. Bıyl da solaı naýryzda eki júzden astam adamǵa shaqtap qazy aınaldyrdym. Ekinshi jumysyma baılanysty kóbine ýaqytym jete bermeıdi. Jaqyn arada jetkizip berý qyzmetin bir jolǵa qoıýym kerek, – degen Saǵynǵalı qazyny óz úıindegi shaǵyn as bólmesinde aınaldyra beredi.

Áıtse de ol qazy satýdy turaqty bızneske aınaldyrýdyń naqty josparyn quryp, iske asyrýdy bastap ta ketipti. Onyń sózinshe, Belgııanyń bıznes klımaty qolaıly ári ekonomıkalyq-ındýstrııalyq jaǵynan óte jaqsy damyǵan. Degenmen jergilikti bılik organdary bıýdjet saıasatyn júrgizýde syrttan kelgen ózge eldiń azamattaryna qatqyldyq tanytatyn bolyp shyqty.

«Men sııaqty sheteldik jeke tulǵalar men korporatıvtik uıymdarǵa salyq kóp mólsherde salynady. Mysaly, men kólikke salynatyn, ózge de qosymsha salyqtardy eseptemegen kúnniń ózinde tabysymnyń 30 paıyzyn salyqqa tóleımin», deıdi. Saǵıdyń aıtýynsha, Eýropada kıiz úı óte tanymal. Osy jazda Belgııadaǵy Ardenna qyratyna 5-6 kıiz úı tigip, shaǵyn demalys aımaǵyn ashýdy kózdep otyr.

– Qazir kıiz úıler tabyldy, tek logıstıka máselesi sheshilip ketse bolǵany. Gollandııa, Fransııa, áıteýir qıyrdaǵy qaı qazaqpen sóılesseńiz, týyp-ósken ortasyn, mádenıetin saǵynyp turady. Osy kásibim sonshalyqty úlken tabys ákelmes te, biraq elimniń kishkentaı bólshegin Eýropanyń bir buryshyna ornalastyryp qoıǵym keledi, – deıdi Saǵynǵalı.

Qazir Saǵynǵalı sııaqty 5 mıllıonnan astam qandasymyz shet memleketterde turyp jatyr. Árqaısysy ózinshe tirlik keshýde. Elde jatyp alyp et pen sorpanyń qadirin bálkim, biz bile bermespiz. Biraq qıyrda júrip eldiń dámin ańsaǵan Saǵynǵalıdyń saǵynyshtan týǵan bastamasyna ishimiz jylyp qaldy. Qıyrdaǵy qazaqtyń bireýi bolsyn túzý turmys keship, jadyrap júrse «alystaǵy aǵaıyn edi-aý» dep, árdaıym ishteı tilekshi bolyp otyratynymyz shyndyq.

Aıa О́MIRTAI,

«Egemen Qazaqstan»

Sońǵy jańalyqtar

Atyraýda birqatar sheneýnik jazalandy

Aımaqtar • Búgin, 19:55

Dıllıan Ýaıt qaharyna mindi

Kásipqoı boks • Búgin, 19:10

Alvaresti Andrademen kezdespegeni úshin aıyptady

Kásipqoı boks • Búgin, 18:05

Sıngapýrdyń sońǵy aýyly

Álem • Búgin, 17:55

Ahmet Baıtursynulyna eskertkish ornatylady

Rýhanııat • Búgin, 17:20

Petr Iаn úzdikter qataryna endi

Jekpe-jek • Búgin, 16:05

Uqsas jańalyqtar