Qaı eldiń jastarynyń rýhy bıik, tanymy tereń bolsa, sol halyqtyń bolashaǵy zor. Ǵabıt Músirepov bir sózinde: «Men jastarǵa: Aldaryńda taýdaı talap tur. О́mir zańǵarlary únemi bıikke shyǵarady. Oǵan jetý úshin talmaı izdenińder der edim. Jastarǵa toǵysharlyq, boıkúıezdik dertinen aýlaq, sergek, sezimtal bolǵan jarasady» degen eken.
Jastar elimizdiń bolashaǵy dep jatamyz. Elbasy jastarǵa qoldaý kórsetýdi árdaıym basty nazarda ustap keledi. Sol jastar óz áleýetin tolyq paıdalana alyp júr me, QHA qyzmetinde jastar qozǵalysynyń róli qandaı, qoǵamdyq sanany jańǵyrtýdyń mańyzdylyǵy, nede degen mazmundaǵy máseleler belsendi jastar basqosýynda ashyq dıalog formatynda talqylandy. Erekshe talantymen daralanǵan kóshbasshy jastar jetistikke jetý jolyndaǵy tájirıbelerimen bólisip, óz oı-pikirlerin ortaǵa saldy.
Assambleıa janynan qurylǵan «Jańǵyrý Joly» respýblıkalyq jastar qozǵalysy elimizdiń ár óńirindegi jastar men jasóspirimderdiń qarym-qabiletin ashyp, otansúıgishtikke tárbıelep, azamattyq ustanymdaryn qalyptastyrý, óz ıdeıasyn júzege asyrýǵa múmkindik ashý maqsatynda qurylǵan. Atalǵan birlestik búgingi tańǵa deıin birneshe jobany júzege asyryp úlgergen. Sonyń biri – elimizdiń irgeli oqý oryndarynda belsendi jastar klýbyn quryp, mádenı-tanymdyq, sporttyq saýyqtyrý baǵytynda jastardyń erik-jigerin shyńdaýǵa baǵyttalǵan jańa joba.
– Mundaı basqosýlar stýdent jastar men joǵary synyp oqýshylaryn tyń talpynystarǵa jeteleıdi. San salada jetistikke jetken aldyńǵy býyn ókilderiniń júrip ótken joldary olarǵa úlgi-ónege bolýy tıis. Búgingi sharaǵa 38 oqý ornynan kelgen stýdentter qatysyp otyr. Elimiz táýelsizdik alǵaly beri memleket tarapynan jastarǵa kóp qoldaý kórsetilip keledi. «Bolashaq» sııaqty baǵdarlamalar ashylyp, shet elderde de bilim alýǵa múmkindik týdy. Jastar arasynan jańa lıderlerdi izdep, eń talanttylaryna erekshe qoldaý kórsetý úzdiksiz júrip otyrý kerek, – deıdi «Jańǵyrý Joly» respýblıkalyq jastar qozǵalysy tóraǵasynyń orynbasary Tımýr Jumyrbaev.
Jastar birlestigi aldaǵy ýaqytta Qazaqstan halqy Assambleıasynyń uıytqy bolýymen qaıyrymdylyq jumystarǵa, stýdentterdiń tanym kókjıegin keńeıtýge baǵyttalǵan tatýlyq pen kelisim jobasyn iske asyrýdy josparlap otyr. Basqosýda aıtylǵan usynys-pikirler eskerilip, aldaǵy jumys barysy tyń ıdeıalardyń negizinde órbimek.
Aǵalar qaýymy jıǵan-tergen, kórip bilgen ómirlik, aqparattyq tájirıbesin jastarmen bóliskeni jón. Jas býyn úlkenniń aqylynan ǵana emes, óziniń qatesinen sabaq alýy tıis. Qýanyshtysy sol, búgingi kezdesýde aǵa býyn men jastar arasyndaǵy rýhanı sabaqtastyq úrdisin úzip almaý máselesi keńinen sóz boldy. Mundaı pikir almasý alańdary el erteńi sanalatyn óskeleń urpaqtyń birligin nyǵaıtyp, kóptegen jarqyn jetistikterge jol ashpaq.
Arman OKTIаBR,
«Egemen Qazaqstan»
ALMATY
