Komıtet tóraǵasy Darıǵa Nazarbaeva kórshi eldiń Kemerovo qalasynda oryn alǵan qaıǵyly oqıǵaǵa baılanysty turǵyndar qaýipsizdigine, ásirese balalardy túrli qaterden qorǵaýǵa basa nazar aýdarylyp otyrǵanyn atap ótti. Kemerovo oqıǵasy – adamdar qaýipsizdigin eń birinshi kezekke qoıatyn, árqaısymyzdy oqıǵa zardaptary týraly oılaýǵa mindetteıtin ashy sabaq boldy.
Ishki ister mınıstrligi tótenshe jaǵdaılar jónindegi komıtetiniń tóraǵasy Vladımır Bekker adamdar kóp keletin nysandardyń órtten qaýipsizdigin qamtamasyz etý sharalary jáne osy saladaǵy ózekti máseleler týraly depýtattardy habardar etti.
Parlamentshiler adamdar kóp jınalatyn áleýmettik ınfraqurylymdar menshik ıeleriniń órtten qaýipsizdik talaptaryn buzǵany jáne saqtamaǵany úshin jaýapkershiligin kúsheıtý jónindegi normatıvtik quqyqtyq aktilerge ózgeris engizý qajettigin atap ótti. Sondaı-aq mundaı nysandardy Ekonomıkalyq yntymaqtastyq jáne damý uıymy elderiniń tájirıbesi boıynsha órt jaǵdaıyna mindetti saqtandyrýdy engizý usynyldy.
Bilim jáne ǵylym mınıstrligine jalpy bilim berýdiń bastaýysh jáne orta bilim baǵdarlamasyna órtten qaýipsizdik erejelerin oqytý jáne tótenshe jaǵdaılar bolǵan kezde durys áreketter jasaýǵa daǵdylandyrýdy qosý múmkindigin pysyqtaý usynyldy.
Depýtattar sondaı-aq órt qaýipsizdigin qamtamasyz etý salasynda jumys istep kele jatqan kásiporyndardyń qyzmetin lısenzııalaýdy qaıtarýdy da usyndy.
Otyrys barysynda V. Bekker elimizdegi tasqyn sý jáne eldi mekenderdi sý basyp ketýge oraı eskertý jónindegi júrgizilip jatqan jumystar týraly baıandady.
Talqylaý qorytyndysy boıynsha senatorlar tótenshe jaǵdaılar jónindegi komıtet bólimsheleriniń jergilikti atqarýshy organdarmen jumystarynda úılesimniń joqtyǵyn, sondaı-aq tótenshe jaǵdaılar jónindegi oblystyq departamentterdiń jáne jumyldyrý daıyndyǵy, azamattyq qorǵanys basqarmalary, ákimdikterderdiń avarııalar men tabıǵı apattardy eskertý jáne zardaptaryn joıý uıymdary mindetteriniń qosarlanýy týraly atap ótti. Senatorlar tıisti qyzmetterdiń ákimshilendirý júıesine reforma júrgizýdi jáne jergilikti atqarýshy organdardyń kóktemgi sý tasqynyna daıyndyq jumystaryn nashar júrgizgeni úshin jaýaptylyǵyn kúsheıtýdi usyndy.
«Kásibı áskerılendirilgen avarııalyq-qutqarý qyzmeti» respýblıkalyq memlekettik kásiporny bas dırektorynyń mindetin atqarýshy Dıqanbek Satylǵanov osy qyzmettiń jumysy týraly jan-jaqty baıandap berdi. Onyń mindetteri aıasynda taýda qutqarý, qaýipti óndiris nysandaryndaǵy sý burqaǵyna qarsy, gazdan qutqarý jumystaryn oryndaý bar. Búgingi tańda avarııalyq-qutqarý mindetin básekelester ortasyna berý, al RMK-ny jeke qolǵa berý týraly sheshim qabyldandy. Turǵyndardyń, strategııalyq mańyzy bar iri óndiris nysandarynyń qaýipsizdigi memlekettik organdar tarapynan jan-jaqty, muqııat zerdeleýdi jáne baqylaýdy talap etetindikten depýtattar qaýipti óndiris nysandaryn avarııadan eskertý jáne onyń zardaptaryn joıý jónindegi biryńǵaı memlekettik qyzmet – «Kásibı áskerılendirilgen avarııalyq-qutqarý qyzmeti» respýblıkalyq memlekettik kásipornyn saqtaý, ony jekeshelendirýge jatatyn uıymdar tiziminen alyp tastaýdy usyndy.
Qazirgi kezdegi básekege qabiletti naryqta sapaly balama qyzmet ázirge qurylǵan joq. Tájirıbe kórsetip otyrǵandaı, jeke kompanııalardyń tıisti tájirıbesi de, ónerkásip oryndaryndaǵy tótenshe jaǵdaı oryn alǵandaı bolǵanda durys kómek beretin jabdyqtary da joq.
Kezdesý qorytyndysy boıynsha usynystar ázirlenip, Qazaqstan Respýblıkasynyń Úkimetine jiberiletin boldy.
