Kezekti «1000 oryn – kóshe saýdasy» baǵdarlamasyn júzege asyrý blokcheın júıesi boıynsha mamyr aıynda ótedi. Bul óz kezeginde adamı faktordy barynsha qysqartyp, oryndardy ashyq túrde bólýge septigin tıgizedi. Bul týraly konferensııa barysynda qala ákimi Á. Isekeshev aıtty.
«1000 oryn – kóshe saýdasy» baǵdarlamasy boıynsha 640 oryn kásipkerlerge berildi. Osy jyly biz qosymsha taǵy 150 iri saýda alańyn daıyndadyq. Mamyr aıynda bássaýda ótedi. Biz ony blokcheın boıynsha ótkizemiz, ol oryndardy ashyq túrde bólýge septigin tıgizedi. Qalamyzdyń aýdandary da osy baǵytta jumystardy bastady. Mysaly, «Saryarqa» aýdany forým ótkizedi, shaǵyn dúkender, dárihana, JÚZ qalyptastyrý úshin ashyq negizde 100-ge jýyq shaǵyn ýchaskeler usynylady», - dedi ákim.
«Atameken» UKP Tóralqa tóraǵasy Tımýr Qulybaev Astana qalasynda bıznesti damytýǵa oń ózgerister bolyp jatqanyn atap ótti. Ol qazirgi kúnde «1000 oryn – kóshe saýdasy» baǵdarlamasy el boıynsha qolǵa alynyp jatqanyn aıtty.
«Astanada bastaý alǵan bastamalar barlyq el boıynsha qolǵa alynýda. Mysaly, «1000 oryn – kóshe saýdasy» baǵdarlamasy tıimdi júzege asyrylýda. Qazirdiń ózinde 650 saýda orny jańa ıesine berildi. Bul baǵdarlamany biz el boıynsha engizýdi josparlap otyrmyz, muny qoldady. Úkimet arqyly sala boıynsha barlyq ákimdiktermen jumys jasaýdamyz», - dedi Tımýr Qulybaev.
«1000 oryn – kóshe saýdasy» baǵdarlamasy Astanada 2016 jyly júzege asyryldy. Ol birden eki máseleni sheshýge kómektesedi: shaǵyn jáne orta kásipkerlikti damytýǵa, sonymen qatar kóshe saýdasyn qazirgi zamanǵy stılde damytýǵa sep.
