Batys Qazaqstan oblystyq halyq shyǵarmashylyǵy ortalyǵy uıymdastyrǵan sharaǵa Astana, Almaty qalalarynan, Pavlodar, Qyzylorda, Ońtústik Qazaqstan, Mańǵystaý, Atyraý, Aqtóbe, Batys Qazaqstan oblystarynan 18 úmitker qatysty. Qazaqstan Respýblıkasynyń mádenıet qaıratkeri, Qurmanǵazy orkestriniń múshesi Maqsat Tilepbergen, Qalamqas Orashevanyń kenje qyzy Aqmaral Sársenǵalıeva, basqa da týystary arnaıy keldi.
Bul baıqaý – ómirden 35 jasynda qyrshyn ketken óner ıesiniń 50 jyldyq mereıtoıyn atap ótken 2003 jyldan bastap araǵa bes jyl salyp ótip keledi. Oǵan 18-35 arasyndaǵy ánshi-termeshi qyz-kelinshekter, buryn-sońdy bas júlde almaǵan ónerpazdar qatysady. Eki bólimnen turatyn saıysta olar terme-tolǵaýlar men uzaq dastandardy oryndaıdy. Basty maqsat – kórinbeı júrgen talanttardyń juldyzyn jaǵý, dástúrli jyrshylyq ónerdi damytý.
- Qazylar alqasyna halyqtyń ókpesi bolmaǵan sııaqty. Saıys bastalar kezde-aq halyqqa aıttym: tórelik etýshi – Qazaqstan Respýblıkasynyń eńbek sińirgen ártisi Sáýle Taýdaeva, Qazaqstan Respýblıkasynyń Mádenıet qaıratkeri, ánshi-termeshi, Almatydan arnaıy kelgen Bıbijar Mahanbetova, kesh ıesiniń týǵan sińlisi, Qazaqstan Respýblıkasy mádenıet salasynyń úzdigi Meıramgúl Orash, Qazaqstan Respýblıkasy mádenıet salasynyń úzdigi, jyrshy-termeshi Armat Islamǵalıev – bulardyń bári de Ǵarıfollanyń tól shákirtteri, batys án dástúrin jalǵastyrýshy myqty ónerpazdar ǵoı. Oraldan oqyp, orystan sabaq alǵan eń osaly men boldym, - deıdi qazylar alqasynyń tóraǵasy Qazaqstan Respýblıkasynyń eńbek sińirgen mádenıet qyzmetkeri, Qazaqstan Respýblıkasy Mádenıet salasynyń eńbek sińirgen qaıratkeri, ánshi-termeshi Qatımolla Berdiǵalıev.
Qazylar shynymen de ádil tórelik etken. Alqa tóraǵasy Qatımolla Berdiǵalıevtiń aıtýynsha, budan buryn ótken baıqaýda oryndaǵan shyǵarmasyn sol kúıinde qaıta báıgege salmaq bolǵan ónerpazdar birden saıystan shettetilgen. «О́nerge olaı júrdim-bardym qaraýǵa bolmaıdy ǵoı» deıdi ánshi.
Sonymen, baıqaýdyń bas júldesi – 500 myń teńge Oral qalasyndaǵy Qurmanǵazy atyndaǵy saz kolledjiniń III kýrsynda oqyp júrgen stýdent Ámına Ǵaınedenovaǵa buıyrdy. Birinshi oryn – qyzylordalyq Zúlfııa Baımurzıevaǵa, einshi júlde – Mańǵystaý oblysy, Jańaózen qalasynan qatysqan Janar Nurmuhanovaǵa, úshinshi oryn – oraldyq Aqmaral Kemelhanovaǵa tıdi.
Budan bólek baıqaýda batysqazaqstandyq tanymal jyrshy-termeshiler atynda arnaıy júldeler de taǵaıyndalǵan eken. Jaqsylyq Sársenǵalıev atyndaǵy júlde – mańǵystaýlyq Dámegúl Izbasarovaǵa, Qalampyr Rahımova atyndaǵy júlde – almatylyq Janargúl Sárkenovaǵa, Amangeldi Ǵubaıdýllın atyndaǵy júlde – atyraýlyq jas termeshi Arýjan Erimovaǵa, Kósherǵalı Makarov atyndaǵy júlde – Astana qalasynyń atynan shyqqan Zınat Qasymovaǵa buıyrdy.
- Almatyda Ǵarekeńniń stýdııasyn ustap otyrǵan Janargúl Sárkenovadan kóp úmit kútken edim. Daıyndyǵy nasharlaý boldy. Astanadan kelgen Zınat qyzymyz buryn-sońdy jyrlanbaǵan «Baıbaraq batyr» dastanyn tuńǵysh tartý etti. Sóıtip, arnaıy júldeden bólek, «Baıbaraq batyr» qorynyń syılyǵyna ıe boldy. Al endi bas júlde alǵan Ámına Ǵaınedenova – janyp turǵan qyz eken. Osy otty óshirip almasa, túbi tanymal ónerpaz bolady, - deıdi Qatımolla Berdiǵalıev.
Qazbek QUTTYMURATULY
«Egemen Qazaqstan»
Batys Qazaqstan
Sýretterdi túsirgen Nurbek IHSAN
