Al Otyrar aýdanynda quny 80 mln teńge bolatyn balabaqsha, 50 mln teńgege etnoaýyl, 56 mln teńgege «Ardagerler» saıabaǵy salynsa, Ordabasy aýdanynda 45,3 mln teńgege qaıyrymdylyq kómek kórsetildi. Bul ıgi isterdiń barlyǵy kásipkerler, demeýshiler tarapynan júzege asyrylýda. Elbasynyń «Bolashaqqa baǵdar: rýhanı jańǵyrý» atty baǵdarlamalyq maqalasynyń jarııalanǵanyna bir jyl tolýyna oraı Shymkentte ótken «Ult tarıhyndaǵy Uly beles» atty respýblıkalyq jıynda oblys ákimi J.Túımebaev joǵaryda aıtylǵan jumystar baǵdarlama sheńberinde iske asyrylyp jatqan óńirlik jobalardyń bir parasy ǵana ekenin atap ótti. «Elbasy usynyp otyrǵan rýhanı jańǵyrýdyń negizgi sıpaty ótken men bolashaqty úılestire júzege asyrý bolǵandyqtan, biz muny eki arnada iske asyrýymyz qajet. Onyń biri – ǵalamdyq jetistikterdi ózimizge ákelý arqyly jahandyq damýda óz úlesimizdi alý. Ekinshisi – ótken tarıhymyz ben dástúrimizdegi asyl qundylyqtarymyzdy qaıta jańǵyrtyp, ulttyq biregeıligimizdi saqtap qalý. Osy oraıda, Elbasy aýqymy keńeıip, «Týǵan elge» ulasatyn «Týǵan jer» baǵdarlamasyn qolǵa alýdy usynyp, ony júzege asyrýdyń naqtyly joldaryna deıin kórsetip berdi», dedi oblys ákimi. О́ńirde «Týǵan jer» jobasy boıynsha 31 mlrd 467 mln teńgeni quraıtyn 577 nysan boı kótergen. Olardyń qatarynda bilim, densaýlyq, sport, mádenıet jáne áleýmettik ǵımarattar bar.
«Rýhanı jańǵyrý» baǵdarlamasyn júzege asyrý maqsatynda qurylǵan óńirlik jobalyq keńse tarapynan 46 joba, 168 is-shara ázirlenip, júzege asyrylýda. Al baǵdarlamanyń mán-mańyzyn túsindirý, nasıhattaý sharasyna 1 mıllıonnan astam adam qamtylǵan. Aıryqsha mańyzy bar tarıhı-mádenı sáýlettik jáne arheologııa eskertkishteriniń fotoalbomy qazaq, orys, aǵylshyn tilderinde jasalynyp, taratylǵan. Oblys ákiminiń málimdeýinshe, tarıhı-mádenı muralardy nasıhattap, jastarǵa patrıottyq tárbıe berý maqsatynda túsirilgen «Kóne jetigenniń syry» atty 10 serııaly telehıkaıa, «Kıeli Qazyǵurt», «Otyrardy qorǵaý», «Kúsh atasy – Qajymuqan» atty anımasııalyq jáne «Uly Jibek jolyndaǵy eskert-
kishter» derekti fılmderi kópshilik nazaryna usynyldy. Al Saıram aýdanyndaǵy «Hanqorǵan» arheologııalyq qalashyǵyna qazba, restavrasııa jáne konservasııa jumystary júrgizilip, ashyq aspan astyndaǵy mýzeı ashylmaq. Saıramnan shyqqan 3 Saıramı, Otyrardan shyqqan 30 ál-Farabı, Iаssydan shyqqan 5 Iаsaýıdiń týyndylary qazaq tiline aýdarylyp, jarııalanatyn bolady. Alda atqarylatyn isterdiń taǵy biri – «Ordabasy taýy» qoryq murajaıyna el birligin dáriptegen qazaq halqynyń Tóle, Qazybek, Áıteke bılerine monýment ornatylady. Sondaı-aq bıyl «Rýhanı jańǵyrý» baǵdarlamasy aıasynda Ońtústiktiń kóne qalalary, tarıhı tulǵalary, tabıǵaty, kıeli oryndary, ádet-ǵuryptary týraly 17 kitap shyǵarý, 10 fılm jáne 4 anımasııalyq fılm túsirý jumystary bastalǵan.
Jalpy, Elbasynyń «Bolashaqqa baǵdar: rýhanı jańǵyrý» maqalasy aıasynda Ońtústik Qazaqstan oblysynda bir jyl ishinde 4370 is-shara uıymdastyryldy. Baǵdarlamany iske asyrý úshin is-sharalar jospary ázirlenip, óńirlik komıssııa jáne sarapshylar keńesi qurylǵan bolatyn. Sarapshylar keńesiniń quramynda zııaly qaýym, ǵalymdar, úkimettik emes uıymdar ókilderi, barlyǵy 20 adam jumys istedi. Oblys ákimdiginiń málimetinshe, «Rýhanı jańǵyrý» baǵdarlamasyn iske asyrý boıynsha óńir respýblıkada aldyńǵy qatarǵa shyqqan.
Ǵalymjan ELShIBAI,
«Egemen Qazaqstan»
ShYMKENT
