Art-galereıanyń ashylý rásimine Qazaqstan Respýblıkasynyń bilim jáne ǵylym vıse-mınıstri Bıbigúl Asylova, otandyq joǵary oqý oryndarynyń rektorlary men jas ǵalymdar qatysty.
Maqsat – oqý ornynyń kásibı qylqalam sheberleriniń eńbekterin keńinen dáripteý. Art-galereıada Qyzdar Ýnıversıtetiniń Kásiptik bilim kafedrasynyń professor-oqytýshylary men stýdentteriniń 20-dan astam kartınasy qoıylǵan. «Dara» ataýyna sáıkes, galereıaǵa qoıylǵan óner týyndylary ortaq ıdeıaǵa baǵynyp, bir taqyrypty qaýzaıdy. Ol – elimizdegi tek qyzdar bilim alatyn birden-bir joǵary oqý ornynyń ózindik ereksheligi, qazaq halqynyń turmys-tirshiligi, etnotaqyryptar jáne týǵan eldiń tabıǵaty. Tek boıaý, stıl jáne janry ártúrli.
– Kartınalar ilingen qabyrǵalarǵa jaǵalata kóz salǵannan-aq ashyq tústi boıaýlardyń jarqyn, jaıdary taby sezilip, janyńnan samal esip ótkendeı bolady. Kórkem ádebıette kezdesetin shymyr oqıǵa, sátti sıýjet, qyzyqty baıandaý, kelisti uıqas dep jatatyn tásildiń bári boıaý kúshimen keneptiń ústine kóship alǵandaı áser beredi. Qylqalam sheberiniń jetkizgisi kelgen ıdeıasy kóńil-kúımen keremet sabaqtasqan, – deıdi shara uıymdastyrýshylary.
