Jarys jeńimpazdary maýsym aıynda Astana qalasynda ótetin Ulttyq chempıonatqa qatysatyn bolady. Sondaı-aq, oblystyq bilim basqarmasynyń dıplomdary men medaldar tapsyrylady.
Elbasynyń «100 naqty qadam» Ult Josparyn júzege asyrý sheńberinde jalpy eńbek qoǵamyn qurý jáne jumysshy mártebesin arttyrý boıynsha oblystyq bilim basqarmasynyń uıymdastyrýymen ótip jatqan chempıonattyń ashylý saltanatyna Májilis depýtaty Á.Bekturǵanov bastaǵan tómengi palata depýtattary, oblys ákimi J.Túımebaev, «Nur Otan» partııasynyń Ortalyq apparaty men Bilim jáne ǵylym mınıstrliginiń ókilderi jáne О́zbekstan Respýblıkasy men Jambyl, Qyzylorda oblystarynan delegattar qatysty.
Jas ónertapqyshtar qonaqtarǵa óz eńbekterin tanystyryp, jan-jaqty maǵlumat berdi. «Memleket basshysy Nursultan Nazarbaev elimizde bilim berýdi damytý, sonyń ishinde tehnıkalyq-kásiptik mamandardy daıarlaýǵa úlken mán berip otyr. «Qazaqstan–2050» strategııasynyń negizgi basym mindeti eldiń ındýstrııalyq-ınnovasııalyq damý suranystaryn eskere otyryp, básekege qabiletti kadrlardy daıarlaý bolyp tabylady. Oblystaǵy tehnıkalyq jáne kásiptik bilim salasynda Elbasymyzdyń «Bes áleýmettik bastamasy» aıasynda aýqymdy sharalar qabyldanyp jáne 2017 jylǵy qyrkúıekten bastap «Barshaǵa tegin kásiptik-tehnıkalyq bilim» jobasy júzege asyrylýda»,- dedi oblys ákimi bilim jarysynyń ashylý saltanatynda.
Aıta ketelik, byltyrǵy «WorldSkills Kazahstan -2017» Ulttyq chempıonatynda oblystan 9 quzyrettilik boıynsha qatysqan stýdentterdiń 1-i altyn medal, 5-i kúmis medal ıelense, jeńil ónerkásip jáne servıs kolledjiniń stýdenti Ulybrıtanııa, Japonııa, Qytaı, TMD elderi qatysqan «WorldSkills Rossia - 2017» halyqaralyq chempıonatynda III oryndy jeńip alǵan bolatyn.
Erkin DOSYMBAI,
Ońtústik Qazaqstan oblysy
