Is-sharaǵa depýtattar, qoǵam qaıratkerleri, elimizdiń jáne sheteldiń sarapshylary, ǵalymdar qatysty. Dóńgelek ústeldi ashqan Astana qalasy saıası zertteýler assosıasııasynyń basshysy Qarlyǵash Nuǵymanova Qazaqstannyń BUU Qaýipsizdik Keńesine tóraǵalyq etýi tarıhı mańyzy bar ekenine aıta kele, elimizdiń bastamalary álemdik beıbitshilik pen qaýipsizdikti saqtaýǵa óz úlesin qosatynyn málimdedi.
«Qazaqstannyń BUU Qaýipsizdik Keńesinde kótergen máselelerin odan ári damyta túsý bizdiń mindetimiz. Elimizdiń bastamalary konseptýaldy áreketke negizdelgen, beıbitshilik pen qaýipsizdikti nyǵaıtýǵa baǵyttaldy. Búgingi jıynda Qazaqstannyń bastamalaryn analıtıkalyq zertteýge negizdelgen baǵa berýge talpynamyz», dedi Q.Nuǵmanova.
Budan keıin sóz alǵan Qazaqstannyń tuńǵysh syrtqy ister mınıstri Tóleýtaı Súleımenov te elimizdiń Qaýipsizdik Keńesine tóraǵalyq etý tarıhı sát ekenin atap kórsetti. Onyń aıtýynsha, elimizge mańyzdy mindet júktelgen ýaqytta álemde saıası qysym kúsheıip turdy.
«Qaýipsizdik Keńesindegi turaqty múshelerdiń arasynda kelispeýshilik týyp, ózara senim máselesi tómendep ketýi elimizdiń syrtqy saıasattaǵy ustanymyna úlken synaq boldy. Osyǵan qaramastan Qazaqstan ózine qoıylǵan mindetti abyroımen oryndap shyqty. Tóraǵalyq kezindegi negizgi maqsattaryna qol jetkizdi», dedi T.Súleımenov.
Qazaqstannyń irgeli uıymdaǵy tájirıbesin sarapshylar da joǵary baǵalady. Máskeý lıngvıstıka ýnıversıtetiniń dosenti Ikbal Dıýrreniń paıymdaýynsha, álem elderi elimizdiń bitimgerlik qabiletine úmitpen qaraıdy. Sózine dálel retinde sarapshy Qazaqstannyń Sırııa máselesin sheshýdegi róline erekshe toqtalyp ótti.
Sonymen qatar jıyn barysynda dóńgelek ústelge qatysýshylar elimizdiń ıadrolyq qarýdy taratpaý, álemdik derjavalar arasyndaǵy dıalogty qalpyna keltirý, álemde beıbitshilik pen qaýipsizdikti nyǵaıtý máseleleri jóninde kótergen bastamalarynyń mańyzy týraly talqylady.
Abaı ASANKELDIULY,
«Egemen Qazaqstan»
