Reseıdiń Iаmal-Nenes avtonomııalyq okrýginiń joǵary oqý ornynan kelgen delegasııa ekologııalyq ekspedısııanyń maqsat-sharttarymen tanystyrdy. Osydan 5 jyl buryn bastalǵan ekologııalyq qozǵalysqa Reseı, Avstrııa, Bolgarııa, Ýkraına, Qytaı jáne Kýba elderinen 160-tan astam ókil qatysypty. Eriktiler Arktıkanyń soltústik bóligin aýyr metall qaldyqtarynan tazartypty.
Soltústikqazaqstandyq jastar shaqyrýdy qabyl aldy.
«Soltústik Qazaqstan men Iаmal-Nenes óńirleriniń arasynda uqsastyq kóp. Sizder sııaqty biz de soltústik aımaqta turamyz. Eki tarap arasyndaǵy dostyq qarym-qatynas odan ári bekı túserine senimdimin», deıdi Iаmal-Nenes avtonomııalyq okrýginiń halyqaralyq syrtqy baılanys departamenti dırektorynyń birinshi orynbasary Sergeı Ýramaev.
Ekologııalyq ekspedısııa 15 kúnge jalǵasady. Úmitkerler ekologııa jáne bıologııa mamandyqtary boıynsha oqyp júrgen stýdentterden iriktelip alynady. Olar ekspedısııanyń quramynda Karsk teńiziniń jaǵalaýynda ornalasqan, búginde adam turmaıtyn Vılkısk aralynyń tańǵajaıyp tynys-tirshiligimen tanysatyn bolady. Kezinde munda iri óndiris oryndary bolǵan. Osynda metall qaldyqtaryn jınap, ekologııalyq tazalyqqa úles qosý–ekspedısııanyń basty maqsaty.
«Arktıka eriktileri» jobasynyń jetekshisi Evgenıı Rojkovskııdyń sózine qaraǵanda 5 jyl boıy Beloe araly qoqystan tazartylypty. Osylaısha araldyń ekologııalyq pasporty barlyq talaptarǵa sáıkestendirilipti. Endigi kezek– Vılkısk araly. Onda tek tikushaq qana qatynaıtyn kórinedi. Uıymdastyrýshylar ekspedısııa múshelerin jatyn orynmen, azyq túlikpen qamtamasyz etedi. Jyldyń ortasha aýa temperatýrasy 10 gradýs sýyqtyqtan aspaıdy.
Ekologııalyq ekspedısııa shilde aıynda bastalady.
О́mir Esqalı,
«Egemen Qazaqstan».
Soltústik Qazaqstan oblysy.
