Bul jaǵdaı ortalyq memlekettik organdardyń jergilikti ózin-ózi basqarý jumystaryna monıtorıng jasap, baqylaý júrgizbeıtinin kórsetip tur. Baqylaý joqtyqtyń kesirinen osy kúnge deıin tek bes oblysta ǵana (Almaty, Atyraý, Jambyl, Qostanaı, Soltústik Qazaqstan) jergilikti qaýymdastyq jınalysynyń reglamenti belgilengen. Al mundaı reglamentsiz jergilikti qaýymdastyq jınalysynyń legıtımdi quramyn anyqtaý múmkin emes. Tek osyndaı quram ǵana zań boıynsha, damý baǵdarlamasyn bekitip, aýyldyq okrýgtyń bıýdjetin jasaýǵa kelisim bere alady.
Demek, osy kúnge deıin jergilikti atqarý organdarynyń málimetindegi damý baǵdarlamasy men 2 myń adamnan artyq turǵyny bar aýyldyq okrýg bıýdjetiniń bekitilýi atalmysh bes oblystan basqa óńirlerde zańsyz jasalǵan. Osyǵan qaramaı olarǵa bıýdjet qarajattary berilip, olar jumsalyp ta jatyr.
Sonymen qatar aýyldyq okrýgterdiń damý baǵdarlamasyn jasaý úshin jergilikti mamandardy oqytyp, metodologııalyq kómekter kórsetýler tıisti deńgeıde bolmaǵandyqtan olar ártúrli jasalyp, qaıta bekitýge týra kelip tur. Sóıtip bıýdjet qarajaty bólinip, jumsalýda, biraq baǵdarlama áli bekitilmegen.
Biz osy máseleniń bárin Premer-Mınıstr Baqytjan Saǵyntaevtyń atyna depýtattyq saýal retinde joldap, tómendegi usynystardy jasadyq:
– Úkimet «Jergilikti memlekettik basqarý men ózin-ózi basqarý týraly» zań normalaryn oryndaýda baqylaýdy kúsheıtip jáne laýazymdy tulǵalardyń jaýapkershiligin arttyrýy kerek. Sonymen birge jergilikti atqarý organdarynyń málimetterine syn kózben qarap, olardy saraptaýdy jetildirgen jón;
– Jergilikti ózin-ózi basqarýdyń alǵashqy kezeńderinde júıeli túrde qatelikter jiberýin boldyrmaý úshin Ulttyq ekonomıka mınıstrligine olardyń jumysyna monıtorıng jáne baqylaý jasaý fýnksııalary berilsin;
Sonymen birge biz Úkimet basshysynan Jergilikti ózin-ózi basqarýdy damytý tujyrymdamasyn iske asyrý josparynyń memlekettik organdar Úkimetke 2018 jyldyń 1 aqpanynda ótkizýge tıisti sharalary týraly aqparat berýdi suradyq.
Nurjan NURSIPATOV,
Senat depýtaty
