Kezdesý barysynda Joǵary Eýrazııalyq ekonomıkalyq keńestiń aldaǵy otyrysynyń kún tártibi, sondaı-aq eýrazııalyq ıntegrasııany odan ári nyǵaıtý máseleleri talqylandy.
Memleket basshysy Eýrazııalyq ekonomıkalyq odaq qyzmetiniń joǵary nátıjelerine toqtalyp, ózge elder tarapynan bul birlestikke qyzyǵýshylyqtyń artyp otyrǵanyn atap ótti.
– О́tken 2017 jyl tabysty boldy. Elderimiz arasyndaǵy taýar aınalymy 27 paıyzǵa artty. Birlestigimizge degen zor qyzyǵýshylyqtyń bar ekenin kórip otyrmyz. Búginde bizben 40-tan astam el yntymaqtastyq ornatty. Biz sizdermen Joǵary Eýrazııalyq ekonomıkalyq keńestiń sammıti qarsańynda kezdesetin bolamyz, onyń kún tártibindegi barlyq másele kelisilgen. Biz kúrdeli máselelerdi, sonyń ishinde sanksııaǵa qatysty máselelerdi de talqylaıtyn bolamyz, – dedi Nursultan Nazarbaev.
Tıgran Sarkısıan Memleket basshysyn Qazaqstan halqynyń birligi kúnimen quttyqtap, elimizdiń órkendeı berýine nıettestigin bildirdi.
– Men Keńestiń tapsyrmasy boıynsha Sizben birqatar máselelerdi talqylasam dep edim. Atap aıtqanda, Joǵary Keńes otyrysyn qalaı tıimdirek ótkizip, qandaı problemalarǵa erekshe mán berý qajet ekenin anyqtaýǵa, sondaı-aq ıntegrasııany nyǵaıta túsýge qatysty máseleler bar, – dedi Eýrazııalyq ekonomıkalyq komıssııa alqasynyń tóraǵasy.
Kezdesý sońynda T.Sarkısıan Qazaqstan Prezıdentine Eýrazııalyq ekonomıkalyq komıssııanyń qazirgi jumystary jóninde málimdedi.
