BBC
Armenııa parlamentiniń depýtattary Nıkola Pashınıandy premer-mınıstr qyzmetine saılamady. Bul sheshimge qarsy halyq narazylyq sherýine shyqty.
Armenııa bıligi aýysady dep kútilgen 1 mamyr kúni on myńdaǵan halyq alańǵa jınalyp, jaqsy jańalyq kútti. Jınalǵan jurt Serj Sargsıan basqarǵan bılik Armenııany «artta qalǵan» memleketke aınaldyryp jiberdi dep shýlady. Túski 12-de tikeleı efırden kórsetile bastaǵan Ulttyq jınalys 8 jarym saǵatqa sozyldy. Otyrysqa 105 depýtattyń 102-si qatysty. Onyń 45-i N.Pashınıannyń kandıdatýrasyn qoldasa, 56-sy qarsy daýys berdi.
Nıkola Pashınıan óz baǵdarlamasyn tanystyryp, 26 depýtattyń suraǵyna jaýap berdi. Oǵan premer bolyp saılaný úshin 53 daýys, ıaǵnı, Respýblıkalyq partııa depýtattarynyń daýysy kerek edi. О́z sózinde ol «Sizderden Armenııanyń bolashaǵy úshin eshqandaı qurbandyq kerek emes. Tek halyq kandıdatyn premer-mınıstr qyzmetine taǵaıyndasańyzdar bolǵany», dedi.
Otyrys barysynda N.Pashınıannyń premer-mınıstr laýazymyna saılanbaǵanyn vıse-premer Edýard Sharmazanov aıtty. Depýtattardyń kóbi kandıdattyń baǵdarlamasy naqty emes ekenin, sybaılas jemqorlyq pen qaýipsizdikti kúsheıtýge baılanysty josparynyń joq ekenin jetkizdi.
Konstıtýsııa boıynsha Pashınıanǵa taǵy bir múmkindik berilmek. 8 mamyr kúni taǵy saılaý ótedi. Eger depýtattar ony saılamasa, bılik ýaqytsha úkimetke ótedi de, jańa parlamenttik saılaý belgilenedi.
NYTIMES
Ońtústik Koreıa soltústikpen shekaradaǵy úgit-nasıhatty toqtatady
Dúısenbi kúni Ońtústik Koreıa osy aptada Soltústik Koreıamen shekaradaǵy daýys zoraıtqyshtardy alyp tastaıtynyn málimdedi. On jyldan astam ýaqyt boıy bul qurylǵylar arqyly soltústikke qatysty úgit-nashatar men túrli jaǵymsyz mýzyka qoıylatyn edi. Ońtústik Koreıa bıligi bul sheshimdi Koreıaaralyq sammıt nátıjesinde qabyldanǵan kelisimdi júzege asyrý úshin jáne Soltústik Koreıa Soltústik pen Ońtsútiktiń ýaqyt aralyǵyn teńestiretinin málimdegennen keıin qabyldaǵanyn aıtty.
Soltústik Koreıa 2015 jyly «Phenıan ýaqytyn» qabyldap, Ońtústik Koreıadan 30 mınýtqa keri shegergen bolatyn. Al Ońtústik Koreıa 250 kılometrge jýyq daýys zoraıtqyshtardy seısenbi kúni alyp tastaı bastady. Bul Ońtústik Koreıanyń psıhologııalyq soǵys júrgizýdegi negizgi quraly bolǵan edi. Daýys zoraıtqyshtary arqyly kúni-túni Soltústiktegi adam quqyqtarynyń shektelýi týraly syn, dóreki mýzyka qoıylyp júrgen. О́tken juma kúni eki el prezıdentteri kezdesetin kezde habar taratý ýaqytsha toqtatyldy.
The Guardian
Plastık jeıtin bakterııa tabyldy
Aǵylshyn ǵalymdary plastıkalyq bótelkelermen qorektenetin jańa bakterııa túrin tapty. Bul jańalyq qazirgi tańda álemdi jaýlaǵan plastıkalyq lastanýmen kúresýge kómektespek.
Eń qyzyǵy, ǵalymdar jańa fermentti oılamaǵan jerden tapqan eken. 2016 jyly Japonııadaǵy qoqystarda plastıkalyq ónimdermen qorektenetin bakterııa bar ekeni týraly jańalyq jarııalanǵany belgili. Atalǵan fermentti zerttep, onyń qalaı damıtynyn baqylaýǵa talpynǵan ǵalymdar molekýlany odan beter kúsheıte túsken. Iаǵnı, bakterııalardyń plastıkalyq ónimderdi joıý qabileti artqan.
Portsmýt ýnıversıtetiniń professory, zertteý jumysynyń jetekshisi Djon Makgıhenniń aıtýynsha, bul jańalyqtyń mańyzy óte zor. Mýtasııaǵa ushyraǵan bakterııa birneshe kún ishinde kez kelgen plastıktiń «tas-talqanyn» shyǵarady. Tabıǵı jaǵdaıda ondaı ónimderdiń joıylýy úshin ǵasyrlar qajet ekeni belgili. Ǵalymdar bakterııany jetildire túsip, keń kólemde qoldanysqa engizýge nıetti.
Aıta keterligi, álemde mınýtyna mıllıon plastıkalyq bótelke satylady. Onyń 14 paıyzy ǵana qaıta óńdeledi eken. Al basym bóligi muhıtqa aǵyp ketedi. Nátıjesinde teńiz janýarlary ýlanyp, muhıttarda plastıkalyq «araldar» paıda bolǵan.
Daıyndaǵan
Gúlnur QÝANYShBEKQYZY,
«Egemen Qazaqstan»
