Astana tórin kúı terbegen kún

Oǵan arnaıy Qazaq Ult­tyq óner ýnıversıtetiniń, L.Gý­mılev atyndaǵy EUÝ-dyń, S.Seıfýllın atyndaǵy Ag­rar­lyq ýnıversıtettiń stý­de­ntteri, Oqýshylar saraıy men №3 mýzykalyq mekteptiń oqý­shylary jáne dombyra-flashmob.kz saıtynda tirkelý arqyly kúı tarta alatyn qala turǵyndary men qonaqtary da qatysa alatyndyǵy aıtylǵan bolatyn.

Sonymen mamyrajaı maı­dyń alǵashqy kúni Astana jur­ty «Báıterek» moný­me­ntiniń al­dyn­da jınaldy. Taıǵa mingen ba­ladan bastap taıaqqa súıengen qa­rııaǵa deıin jınaldy degendi qazaq «taıly-taıaǵy qalmaı» deı­di ǵoı, bul dombyra-flesh­mob­qa dál solaı jınaldy. Bul sózdi kórermender ǵana emes, qatysýshylarǵa da qarata aı­týǵa bolady. Kúıshilerdiń aldy 74 jastaǵy aqsaqal bolsa, kishisi 10 jastaǵy jetkinshek. Al bastaýshysy Astana qala­sy Mádenıet jáne sport bas­qar­masynyń bastyǵy Bolat Ma­jaǵulov. Mundaıda qalanyń má­denıet basqarmasynyń basshysy qolyna dombyra alyp, qal­a turǵyndarynyń qaq ortasynda otyrǵany kózge de, kóńilge de jarasymdy-aq eken.

Dombyra-fleshmobqa dombyraly aqyndardyń arnaý jyrymen bastaldy. «Bes júz kúıshi qolyna dombyra alsa, Bes júz jylqy shapqandaı dúbirletip» dep bastady Serikzat Dúısenǵazy, «Uldarǵa Qurmanǵazy atamyzdyń, Qyzdarǵa Dına apamnyń jolyn bersin» dep qostady Meıirbek Sultanhan, «Tulparlary tyqyrshyp toqtamaı tur, Bolat aǵam jáımenen bastaı bersin» degen Muhtar Nııazovtyń jyrynan keıin kúı aǵyny bógeýdi buzǵan tasqyndaı aǵytylyp kete bardy.

Mádenıet qaıratkeri Nurlan Bekenov dırıjerlik jasaǵan orkestr Qurmanǵazynyń «Sa­ry­­­arqa» kúıin dúrkirete jó­­nel­­di. Ár jaqtan shashyraı ke­lip jaıǵasqan ár adam bir sátte bir kúıdi tógilte jónelgende shynymen de boıyńdy belgisiz bir­ ystyq aǵyn kernep ketedi eken. Bul áser – bólek áser! Bul – qazaqtyń bir demmen soqqan jú­regindeı, bir júrekten shyq­qan tilegindeı eles bergen erekshe sát!..

Teginde, elimizde talaı fle­sh-mob ótip júr ǵoı, biraq bul flesh­mobtyń orny erekshe bol­­dy. О́ıtkeni qazaqtyń tula boı­­ynda dombyranyń úni bar! Dom­byranyń úni qa­nyn­­daǵy qyl per­neni basyp ótkende jan-jú­regi tebirenbeıtin qazaq kem­de-kem. Sóıtip arǵymaqtaı alaǵyzyp alǵan dombyrashylar bir kúımen toqtaı almady. Ke­zek-kezegimen «Balbyraýyn», «Er­ke sylqym» kúılerin tógil­tip-tógiltip kelip, ári qaraı aýyz­dy­ǵyn shaınap alyp qashqan at­tyń basyn «Adaı» kúıine ji­be­re saldy!..

Dombyranyń pernesimen sha­naǵynda oınaqtaǵan on saý­saq shynymen de uly dala tós­inde dúbirlegen myń san tul­par­dyń tuıaǵyndaı dúrkirep tart­ty degeısiń! Tartty! «Adaı­dy» tartpaı kúıshilerdiń de, tyńdaýshy jurttyń da aryny basylar emes. Aıqaılap, shý­lap ashyq aspan astynda te­ńselip tur!

Buryn da mereke kúnderi 10-15 kúıshiniń basyn qosyp «dombyra-dýman» ótkizip jurtqa qazaqy hám merekelik kóńil kúı syılap júrgen «Baıtaq» qoǵamdyq qozǵalysynyń tóraǵasy Jańarǵan Qarabala: «Astana qalasy mádenıet jáne sport basqarmasynyń qoldaýymen «Baıtaq» qoǵamdyq qozǵalysynyń uıymdastyrýymen ótkizip jatqan bul sharany «Uly Dala úni» dep atadyq. Maqsatymyz – mádenı muramyz ben ulttyq rýhanı qundylyqtarymyzdy keń kólemde nasıhattaý. Aldaǵy ýaqytta mundaı fleshmobty budan da aýqymdy etip ótkizý josparda bar. О́zgelerdiń de qyzyǵýshylyǵyn týdyryp jatqan sekildi. Almatyda, basqa qalalarda  ótkizýge qabarlasyp jatqandar bar», - deıdi.

Ulttyq rýhanı qundy­lyq­ta­rymyzdy keń kólemde nası­hat­taý degen osyndaı-aq bolar. Keremet kúı, keremet kún! Ma­myr dese degendeı, kóńildi jurt­qa kúnniń kózi de erekshe eljirep, shýaǵyn tókti! Qyr arqasyn qys qajaǵan as­ta­na­lyqtar arqasyn kúnge, keý­de­sin kúıge tósep ǵajaıyp bir áserge bólendi.

Ularbek NURǴALYMULY,

«Egemen Qazaqstan»