Halyqaralyq konferensııada Almaty qalasynyń ákimi Memleket basshysynyń quttyqtaý hatyn oqyp berdi. Qazaqstan Respýblıkasy Prezıdentiniń sózinde uıymnyń zamanaýı ótkir máselelerdi sheshýdegi, áskerı shıelenister men tabıǵı apattar kezinde zardap shekkenderge der kezinde kómek kórsetýdegi erekshe róli atap ótilgen.
«Qazaqstan Qyzyl Krest pen Qyzyl Jarty aı qozǵalysyna onyń tolyq quqyly qatysýshysy retinde orasan kómek kórsetýde. Búgingi kúni BUU Qaýipsizdik Keńesiniń turaqty emes múshesi, sonymen qatar Astana prosesiniń bastaýshysy retinde elimiz barynsha jetilgen, qaýipsiz jáne turaqty beıbitshilikti ornyqtyrýǵa yqpal etýde. Tek ózara senimge, qurmetke jáne túsinistikke negizdelgen is-qımyl ǵana barsha adamzatty basty maqsatqa jeteleıdi. Konferensııa qorytyndysy boıynsha qabyldanatyn Almaty deklarasııasynyń gýmanıtarlyq daǵdarystardy jeńýdiń jáne kómek pen qoldaýǵa zárý jandardyń ómirin jaqsartýdyń tıimdi joldaryn izdestirýge mańyzdy úles qosatynyna senimdimin», – delingen úndeýde.
Konferensııa barysynda Baýyrjan Baıbek oqıǵaly týrızmdi damyta otyryp Almatynyń iskerlik kelissózder men halyqaralyq bıznes- kezdesýlerdiń basqosý alańyna aınalǵanyn atap ótti. Tek jyl basynan beri qaraı megapolıste EYDU-nyń «Eýrazııa aptalyǵy»,TMD elderi úkimet basshylarynyń qatysýymen sıfrlandyrý Forýmy ótti. Al kúzde birqatar aıtýly halyqaralyq sharalar, sonyń ishinde Dúnıejúzilik densaýlyq saqtaý uıymynyń Almaty deklarasııasynyń 40 jyldyǵyna jáne Eýropadaǵy «Salamatty qalalar» jelisiniń 30 jyldyǵyna arnalǵan konferensııalar ótedi.
«Elimiz Táýelsizdik alǵannan bastap Elbasy Nursultan Nazarbaevtyń basshylyǵymen kópetnosty Qazaqstan halqy beıbitshilik pen turaqtylyqty jáne qarqyndy ekonomıkalyq damýdy tańdady. Búgingi tańda Qazaqstan – Taýly Qarabah pen Tájikstannan bastap Iran men Sırııaǵa deıingi túıtkildi máseleler men daýly kıkiljińderdi sheshý máselesinde medıator retinde tanylǵan eýrazııalyq birden-bir memleket. Sońǵy jyldardyń ózinde Islam konferensııasy men Eýropadaǵy qaýipsizdik jáne yntymaqtastyq uıymdaryna tabysty tóraǵalyq etti. Biz osy kúzde Birikken Ulttar Uıymymen birlese otyryp О́ńirlik hab ashatyn bolamyz. Alǵashqy kezeńde munda 20-ǵa jýyq halyqaralyq uıymdar men agenttikter jumys isteıdi dep kútilýde», – dedi Baýyrjan Baıbek.
О́z kezeginde Qyzyl Krest pen Qyzyl Jarty aı Halyqaralyq Federasııasynyń prezıdenti Franchesko Rokka Almaty deklarasııasynyń aldaǵy tórt jylda uıym úshin basshylyqqa alatyn basty qujattardyń birine aınalatynyn aıtty. Sońǵy ret mundaı deklarasııa 2014 jyly ıtalıandyq Florensııada qabyldanǵan edi.
«17 mıllıonnan astam eriktilerdiń jumysynyń arqasynda biz álemdegi iri gýmanıtarlyq júıe bolyp tabylamyz. Degenmen, bizdiń bastamalarymyzdyń jemisti bolýy jergilikti jerlerdegi jumys pen onyń sapasyna tikeleı qatysty. Bizdiń uıymnyń jumysyn joǵary baǵalaǵan Qazaqstanǵa erekshe alǵys bildiremiz», – dep qorytyndylady sózin Franchesko Rokka.
Aınash ESALI,
«Egemen Qazaqstan».
ALMATY
