Kókshetaýda kúresten Talǵat Ǵazızovty eske alýǵa arnalǵan jarys ótti

Talǵat óziniń qysqa ǵumyrynda sport­tyń talaı belesterin baǵyndyrdy. Al­ǵashqy jattyqtyrýshysy Marat Jar­maǵambetovten tálim alyp, Qyzyl­tý­dyń kúres mektebinen túlep ushqan Tal­ǵat Ǵazızov aldymen Amangeldi aýy­lyn­da bozkilem álippesin úırendi. Keıin Qaraǵandy qalasyndaǵy «Deneshynyq­tyrý jáne sport» tehnıkýmyna oqýǵa qabyl­dandy. Osy jyldary talantty jigit irgeli jarystarǵa qatysyp, el namysyn abyroımen qorǵaǵan edi. Sol atalǵan kúres mektebin bitirip kelgesin Qyzyltý aýda­nyna qarasty О́ndiris aýylynda bal­dyrǵandardy kúreske úıretti. Bapker bolyp júrgen kezinde bir otbasy men týys­taryna pyshaq jumsaǵan qaraqshydan adamdardy qorǵaımyn dep arasha túskende mert bolǵan-dy. Onyń bar sanaly ǵumyry sport pen adamdarǵa janashyrlyq jasaýǵa arnaldy. Bul sharanyń negizgi arqaýy da – elim dep ótken er ulanǵa taǵzym etý edi.

Aqkól aýylyndaǵy bul jarysty uıym­dastyrýǵa bastama kótergen de onyń alǵashqy ustazy Marat Jarmaǵambetov pen jerlesi, kúresten Azııanyń qola júldegeri, respýblıkanyń birneshe dúr­kin chempıony Nurbek Qarjanov. Al Tal­ǵattyń dosy álem birinshiliginiń qaty­sý­shysy, respýblıka jáne halyq­ara­lyq jarystardyń chempıony, belgili balýan Baýyrjan Mádımuhamedov onǵa tarta komanda qatysqan týrnırdiń bas­ty demeýshisi boldy. Kishkentaı ǵana aýyldyń shaǵyn kileminde júzdegen bala beldesip, ózara kúsh synasqandaryn kórip, qýandyq. Alyptar da aýyldan shyqpaýshy ma edi. Eki oblystyń shalǵaı aýyldarynan kelgen jas balýandardyń kózinen ot baıqaǵandaı boldyq. Shań qaýyp, jeńilistiń dámin tatqandar da janarlaryna jas alyp, namystan jylaǵany kóp oıǵa jeteledi. Osy arada ataqty Qajymuqan babamyzdyń Ombynyń sırkinde alǵash kúresken sáti eske tústi. Úlken kilemge jol ashqan sol kúresi talaı adamdy tań­ǵaldyryp edi. Bálkim Aqkóldiń de aıadaı ǵana boz kilemi talaı daryndardy tárbıelemesine kim kepil.

 Biz jarys barysynda osy Aqkólde balalardy beldesý ónerine baýlyp júrgen Nurbek Qarjanovty sózge tartqanymyzda, ol: «Osydan biraz jyl buryn bul óńir­de kúrestiń ne ekenin bilmeıtin edi. Al­ǵash kúres úıirmesi ashylǵaly aýyl bala­lary­nyń yqylasy artyp, baqtary da jandy. Qazir aýdan men oblysty bylaı qoıyp, respýblıkada osy aýyldyń balýandaryn tanıdy da moıyndaıdy. Mysaly, Nur­tileý Kókenov pen Baqtııar Ábýovter el birin­shiligine úzbeı qatysyp keledi. Aýyl balalary arasyndaǵy jarysta bıik nátıje kórsetti. Al Arýlan Muhametálı jáne Er­sin Abylqasymovtar res­pýb­lıkalyq týr­nırlerde birneshe ret jeńimpaz boldy. Jaqynda bul ekeýi Reseıdiń Saha respýb­lıkasynda Olımpıada chempıo­ny Pavel Penıgın júldesi úshin ótken týr­nırge qatysyp qaıt­ty», dep oı bólisti. Demek, shaǵyn ǵana Aqkól aýylynda osyndaı al­qaly týr­nır­diń ótip jatqany tegin emes eken. Sebebi bul aýyl balalarynyń shy­ń­­dalý oshaǵyna aınalady. Osyndaı ja­rys­­tarǵa qatysyp, shyńdalmaǵan jas balýan irgeli saıystarda top jara almasy anyq.

Maǵan Qyzyltýdyń sonaý Ahmetjan Qazymbetovten bastaý alǵan qarymdy kúres óneri Zerendi óńirine aýǵan ba degen oı keldi. Shynynda da, Zerendi ulylardyń kıeli mekeni. «At aýnaǵan jerde túk qala­dy» demekshi, bul ólkeden qarymy myqty balýandar shyǵatynyna senim mol. Búgingi jarys sol bıiktiń alǵashqy bas­pal­daǵy ispettes. Jalpy, on salmaq dá­re­jesinde ót­ken jarysta ár óńirden kel­gen balýan­dar qanjyǵalaryna júlde sal­dy desek, qatelespeımiz. Sondyqtan olar­dy bó­lip-jaryp, jer-jerge bólýdiń qa­jeti bolmasy anyq. Olaı bolsa, Aslan Qoıan­baev, Arýlan Muhametálı, Ersin Abyl­qa­symov, Nurtileý Kókenov jáne taǵy basqa top jarǵan balýandarǵa aldaǵy jarys­tarda mol olja salyp, Olımpıada bıigin baǵyndyrsyn degen tilegimizdi joldaımyz. Júlde alǵan birde-bir sportshy ma­ra­patsyz qalǵan joq. Olarǵa arnaıy dıp­­lom men aqshalaı syılyqtar tabys etildi.

Baqyt SMAǴUL,
Qazaqstan Jýrnalıster 
odaǵynyń múshesi

Aqmola oblysy