Sýret kostanaytany.kz saıtynan alyndy
Buǵan deıin aýdan, qalalardyń balýandary óz óńirlerinde irikteý týrnırin ótkizgen-tuǵyn. Sonda jeńip shyqqan bozkilem sheberleri fınaldyq kezdesýge jınaldy. Olardyń arasynda olqysy joq. Shetinen «sen tur, men ataıyn» atanjilik sańlaqtar. Eki kúnge sozylǵan dodada balýandar segiz salmaq dárejesi boıynsha beldesti.
Máselen, 55 kılogramm salmaqta qostanaılyq Álisher Muhamedjanov týrnır chempıony atandy. 60 kılogramda Myltyqbaı Ábdýaıtovtyń baǵy jandy. 66 kılogramm salmaqta kilemge shyqqan arqalyqtyq Aqjol Qazymbek te eshkimge ese jibermedi. 74 kılogramda synǵa túsken jankeldındik Rýslan Ibraev ta óz qarsylastaryn tegis tize búktirdi. 82 kılogramda Arqalyqtyń namysyn jyrtqan Nursultan Sálimjanov týrnır jeńimpazy atansa, 90 kılogramm salmaqta Altynsarın aýdanynyń balýany Berik Talasovqa teń keler qarsylas tabylmady. 100 kılogramm salmaqta taǵy bir altynsarındik Temirlan Saparov jeńimpaz dep tanyldy. Al, 100 kılogramnan joǵary, asa aýyr salmaqta arqalyqtyq Ǵabıt Balǵynbaev jeńiske jetti.
Ádette, qazaq kúresiniń eń qyzyǵy – «túı balýandyq» báseke ekendigi belgili. Absolıýttik synǵa 30-ǵa tarta balýan jazylypty. Olar úsh saǵat boıy ózara beldesip, jeńgenderi kelesi aınalymǵa shyǵyp otyrdy. Tartysty ótken jarystyń fınalynda qazaq kúresinen Azııa chempıony, halyqaralyq dárejedegi sport sheberi Ramıl Sharygın men birneshe márte el chempıony, sport sheberi Temirlan Saparovtyń joly túıisti. Jankúıerlerdiń qyzý qoldaýyna ıe bolǵan fınaldyq kezdesý Ramıl Sharygınniń paıdasyna sheshildi. Temirlan Saparov ekinshi orynǵa ıe boldy. Endi osy eki balýan oblys namysyn respýblıkalyq «Qazaqstan barysy» týrnırinde qorǵaıtyn bolady.
Jeńimpazdardy oblys ákimi Arhımed Muhambetov quttyqtady. Ol Tobyl-Torǵaı óńirinde qazaq kúresiniń bási joǵary ekendigin atap ótti.
«Bizdiń oblysta nebir talantty sportshylar bar. Ásirese, ulttyq kúres jyl ozǵan saıyn qarqyndy damyp keledi. Oǵan búgin biz men sizder kýá boldyńyzdar. Qostanaı topyraǵynan áli talaı palýandar ósip shyǵatynyna men kámil senemin. О́ıtkeni, oblysta sportqa, onyń ishinde ulttyq sportty damytýǵa erekshe den qoıylyp keledi» dedi Arhımed Benjanuly.
Názıra Járimbet,
«Egemen Qazaqstan»
Qostanaı
