Depýtattar Maksımovka aýylynda «Family Farm» JShS sút zaýytynyń jumysymen tanysty. Parlamentshiler ákimdik ǵımaratynda jergilikti jurtshylyqpen kezdesti. Selınograd aýdandyq ekonomıka jáne qarjy bóliminiń meńgerýshisi Almıra Ibraeva senatorlarǵa aýdandaǵy aýyldyq okrýgterge memlekettik bıýdjettiń tórtinshi deńgeıi qalaı engizilip jatqany týraly aıtyp berdi. Aýmaqtardyń derbestigin arttyrýǵa arnalǵan bul shara Memleket basshysynyń bes ınstıtýttyq reformasyn iske asyrý jónindegi «100 naqty qadam» – Ult josparynda kózdelgen bolatyn.
A. Ibraeva aıtqandaı, Selınograd aýdanynda bıylǵy jyly turǵyndar sany 2 myńnan asatyn eldi mekender bıýdjettiń tórtinshi deńgeıine ótti. Bul rette aýyldyq okrýgter ákimderiniń apparatynyń jumysy kóbeıe tústi, osyǵan baılanysty baıandamashy jergilikti ózin-ózi basqarý organdarynyń shtattyq sanyn ulǵaıtý týraly másele qoıdy. Odan basqa, onyń sózinde joldarǵa kúrdeli jóndeý júrgizý, Maksımovka aýylyna sý qubyryn, mádenıet úıi men monsha qurylysyn salý qajettigi atap ótildi.
Senatorlar sapary Rodına aýylynda odan ári jalǵasty. Onda depýtattar astyq termınalyn, mal sharýashylyǵy kesheni men sút zaýytynyń jumysymen tanysty. «Rodına» agrofırmasynyń bas dırektory Ivan Saýer parlamentshilerge óndiristiń kórsetkishteri týraly áńgimeledi. Depýtattar jergilikti atqarýshy organdar ókilderimen, sharýa qojalyqtary men aýyl sharýashylyǵy mekemeleriniń basshylarymen agroónerkásip keshenin damytý máseleleri týraly keńes ótkizdi.
