«Bir adamnyń kóńilin qaldyrý – bir shahardy buzýmen teń»

Islam – beıbitshilik degen sóz. Tatýlyqqa úndeıtin, týystyqqa shaqyratyn din bul. Quran aıattarynda, paıǵambarymyz (s.ǵ.s) Muhammedtiń hadısterinde, sahabalardan jetken syrly sózderde de el arasyna iritki salatyn, alaýyzdyq týdyratyn, búlikke shaqyratyn birde-bir derek tappaısyz. Kúnine bes ret dáretin alyp, jaınamazǵa jyǵylatyn adam – taza adam. Al taza adam jamanshylyqqa barmaıdy. Ári-beriden soń qasıetti kitapta «bir adamnyń kóńilin qaldyrý – bir shahardy qıratýmen teń» degen sóz bar. Budan biz Islamnyń álemdegi eń beıbitshil din ekenin kóremiz. Degenmen, búginde din atyn jamylǵan, qasıetti dinimizdi ózderine betperde etip alǵan keıbir azamattar Alla taǵalanyń týra jolyn basqa pıǵylda paıdalanyp júr. Adamnyń kóńilin qaldyrýdyń ózin kúná sanaıtyn dindi ustanatyn múminder naqaqtan naq moınyna qan júktemes bolar. Aırandaı uıyp otyrǵan eldiń arasyna iritki salyp, moıyndaryna qarý asynyp, jurttyń záre-qutyn qashyrmas edi. Bul týra joldan taıǵan, haq jolymyzǵa kóleńke túsirgisi keletinderdiń isi. «Adasqannyń aldy jón, arty soqpaq» deıdi dana halqymyz. Aıtyp-aıtpaı ne kerek, bul adasqandardyń isi bolyp otyr. Jaratýshy Alla taǵala «men adamdardy barlyq nár­seden pák etip jarattym» deıdi. О́mirge pák bo­lyp kelgen, pák dindi ustanǵan, sonyń sharıǵat­taryna moıynsunǵan, Jaratqan Iemiz kórsetken týra jolmen júrgen adam qalaısha jamandyqqa barýǵa tıis? Lańkestik, búlik degen uǵymdar Islammen eki dúnıede de qabyspaıdy. Qabyspaıtyny sol, Islam dini zulymdyqty eshqashan jaqtaǵan emes. San ǵasyrlardan beri ata-babamyz týra joldan taı­maı, Ábý Hanafııa mázhabynyń sharttaryn buz­baı us­ta­nyp kele jatyr edi. Keıingi jyldary qa­sıet­ti dini­miz­diń kelbetine daq túsirip, din atyn ja­my­lyp jaman­shylyqqa bastaıtyndar shyǵyp ja­tyr. Bilgen adamǵa olar bizdiń qatarymyzdan emes eke­nin ańǵarý qıyn emes. О́ıtkeni, Islam dini qan tógisti qalamaıtynyn aıttyq. Sondyqtan Alla ta­ǵa­ladan baýyrlarymyzdyń adaspaýyn tileıik. Adasqandar bolyp jatsa, qazaq atam aıtpaqshy «adasqannyń aıyby joq qaıta úıirin tapqan soń» dep baýyrymyzǵa basaıyq. Myna bes kún jalǵanda tatý-tátti ǵumyr keshkenge jetpeıdi. Alla násip etip bergen ǵumyrymyzdy beıbitshilik zamanda, yntymaqtasyp, uıysyp ómir súreıik, aǵaıyn! Muhamedqalı BEKQOJAULY, Eńbekshi aýyldyq «Qoja ata» meshitiniń ımamy. Qyzylorda oblysy, Shıeli aýdany.