Osy rette sońǵy jıyrma jylda tórtkúl dúnıe túgel nazaryn tigip, jahandyq oqıǵalar ótkizýdiń ortalyǵyna aınalǵan Astananyń bási bólek. Iá, arý Astanany iskerlik týrızm ortalyǵyna aınaldyrý jóninde alqaly jıyndardyń bıik minberlerinen az aıtylyp júrgen joq. Osy oraıda atqarylyp jatqan keshendi sharalardyń qarasy da birshama. 2017 jyldyń sońynda otandyq jáne sheteldik tájirıbeli mamandardyń kúshimen jasalǵan «Astana qalasynda týrıstik salany damytýdyń jol kartasy» keshendi baǵdarlamasynyń tusaýkeseri ótkizildi. Atalmysh jol kartasyna sáıkes aldaǵy ýaqytta Astanadaǵy týrıstik salany – iskerlik, qalalyq demalys túrleri jáne medısınalyq týrızm baǵyttarynda damytýǵa basymdyq beriletin bolady. Bas qalamyzǵa týrısterdi barynsha kóp tartý maqsatynda ǵarysh mýzeıi, botanıkalyq baq, jabyq gúlzarlar, akvaparkter jáne basqa buqaralyq mádenı demalys oryndary ashylmaq. Sóıtip 2020 jyly Astana qalasyna keletin týrısterdiń jalpy sanyn eki mıllıon adamǵa jetkizý, onyń ishinde bir mıllıonnan astam sheteldik týrısterdi tartý kózdelip otyr.
Astananyń iskerlik týrızmdi damytýǵa qajetti áleýeti zor. Oǵan adamzat aqyl-oıynyń tamasha tabystarynyń birinen sanalatyn búkilálemdik jetistikter kórmesiniń Halyqaralyq kórmeler bıýrosy Bas hatshysynyń bergen baǵasy boıynsha «sońǵy jıyrma bes jyl ishindegi eń tamasha kórme» retinde úlken tabyspen ótkizilýi aıshyqty dálel bolsa kerek. EKSPO-2017-niń týrızm salasyn damytýǵa barynsha yqpal etetin mol mura qaldyrǵany da daýsyz. EKSPO-2017 kórmesiniń biregeı nysany – «Nur Álem» mýzeı-pavılony. Sarapshylar Parıjdegi Eıfel munarasy, Londondaǵy Hrýstal saraıy sııaqty «Nur Álem» ǵımaraty EKSPO muralarynyń álemdik úlgileriniń qatarynan oryn alady degen pikirdi alǵa tartýda.
Degenmen Astana qalasynyń týrıster tartýda eki mıllıondyq mejeni alýynyń aýyly alys jatqan sııaqty. Naqty statıstıkalyq málimet boıynsha, EKSPO-2017 kórmesi 2017 jyldyń qańtar-qyrkúıek aılarynda elordadaǵy barlyq qonaqúıler men hostelderde 800 myńǵa jýyq týrıst, onyń ishinde 244 myń sheteldik týrıst tirkelgen eken. Ulttyq ekonomıka mınıstrliginiń derekteri boıynsha, 2016 jyly Astana qalasyndaǵy barlyq deńgeıdegi qonaqúılerde 732 764 adam, onyń ishinde 205 188 sheteldik qonaq tirkelse, 2017 jyldyń toǵyz aıynda 790 885 adam, onyń ishinde 243 908 sheteldik qonaq bolǵan. Kórmege kelgen qonaqtardyń kópshiligi páter jaldap turýǵa májbúr bolǵan. «Saıat» týrıstik fırmasynyń jetekshisi Inna Reıdiń aıtýynsha, onyń basty sebebi Astanadaǵy qonaqúılerdegi jambasaqynyń shekten tys qymbattaýynda bolyp otyr. «EKSPO-2017 kórmesi óter qarsańda elordadaǵy qonaqúılerdiń qojaıyndary baǵany 5-10 ese kóterip jiberdi. Kórme jumysy bastalǵan kezeńde qonaqúılerge kelýshiler qatary tómen ekenin baıqap, baǵany túsirgen boldy. Biraq kesh qalǵan edi. Saıttarda, jarnamalarda aldyn ala jarııalanǵan baǵalardy kórip, jurt shoshyp ketti. Qonaqúılerdiń paıdaǵa qunyqqan qojaıyndarynyń ashkózdiginen álemdik EKSPO kórmesine qanshama týrıst kelmeı qalǵanyn kim esepteıtinin qaıdam. Tek bizdiń týrıstik fırmanyń ózindegi málimet boıynsha, kúni buryn kórmege kelýge tilek bildirgen týrısterdiń 70 paıyzǵa jýyǵy qonaqúılerdegi jambasaqynyń shekten tys qymbattaýyna baılanysty sońǵy sátte sapardan bas tartty», deıdi týrıstik fırma basshysy.
Aımaqtyń iskerlik týrızminiń ortalyǵyna aınalýy úshin eń aldymen, jan-jaqty damyǵan ınfraqurylym qajet. Al bul jaǵynan Astana qalasy álemdegi kóshbasshylardyń biri desek aqıqattan alystamaımyz. Týrıster úshin taǵy bir aýadaı qajettilik – aımaqtaǵy tıimdi jol qatynasy, onyń ishinde qoljetimdi áýe qatynasynyń bolýy. Bul rette de Astananyń múmkindigi mol. Búginde elorda tórtkúl dúnıeniń tórt buryshymen senimdi áýe qatynasyn ornatqan. О́kinishke qaraı, másele taǵy da baǵaǵa kelip tireledi. Mamandardyń aıtýynsha, kóptegen áýe kompanııalary Astana áýejaıynyń qyzmet kórsetý tarıfteriniń óte joǵary bolýyna baılanysty jolaqylaryn qymbattatýǵa nemese baǵyttaryn qysqartýǵa májbúr. Joǵaryda aıtylǵandardan shyǵatyn qorytyndy, qyzmet kórsetýshi jekemenshik kompanııalar bolashaqta bas qalamyzdyń iskerlik týrızminiń ortalyǵyna aınalýyna múddeli emes. О́ıtkeni memleket kúshimen jasalǵan qyzmet kórsetý qurylymdaryna ońaı jolmen ıe bolyp alǵandar qolda barda jedel baıyp qalýdy ǵana kózdeıdi. Astana qalasynda, jalpy elimiz boıynsha týrızm salasyn damytqymyz kelse, eń aldymen memleket múddesine basymdyq berilýi kerek. Ol úshin týrısterdiń birinshi kezektegi suranysy, qonaqúılerdiń, meıramhanalardyń jáne áýe qatynasynyń tarıfterin retteý kerek.
Jylqybaı JAǴYPARULY,
«Egemen Qazaqstan»
