Búginde kásipkerlikpen aınalysyp, mol qarjy tapqan azamattar paıdasynyń bir bóligin týǵan jerin damytýǵa jumsap jatyr. Jıynǵa sondaı mesenat azamattarmen qatar ósip kele jatqan jas jetkenshekter de qatysty.
Aýdan ákimdigi týǵan jerdi túletýge úles qosyp júrgen kásipkerlerdi jastarmen tanystyryp, olardan úlgi alýǵa shaqyrdy.
- Búginde Shıeli aýdanynyń damýyna úles qosyp kele jatqan birqatar azamat bar. Máselen, aýdanymyzdyń týmasy Erbol Jeńsikbaev kóp qabatty úılerdiń syrtyn árlep berse, Dáýlet Jumabekov 70 mln. teńgege, Erbolat Mashrapın Alǵabas aýylynan 100 mln. teńgege sport keshenin salyp berdi. Sonyń arqasynda balalar bos ýaqyttaryn sport kesheninde ótkizip, aýyl sportynyń damýyna úles qosýda. Alǵashqy nátıjeler de bar. Olardyń aldy oblystyq, respýblıkalyq jarystarda aımaǵymyzdyń atyn shyǵaryp júr. Sonymen qatar, mesenattardyń kómegimen aýdan ortalyǵynda 30 mln. teńgege alleıa salyndy. Aýdanda «Mektebime taǵzym» aksııasy aıasynda da kóptegen shara atqarylyp jatyr. Ár jylǵy túlekter arnaıy oqý kabınetterin ashyp, mekteptegi kitap qorynyń tolyǵýyna úles qosýda, - dedi aýdan ákiminiń orynbasary Almasbek Ábilqasymuly.
Elbasy «Bolashaqqa baǵdar: Rýhanı jańǵyrý» maqalasynda kásipkerlerdiń óz týǵan jerine úles qosýyn erekshe atap edi. Týǵan jerge tuǵyryn tikken bul azamattar jastarǵa árdaıym úlgi bolady.
Baqtııar TAIJAN,
«Egemen Qazaqstan»
