О́ńirlik kommýnıkasııalar qyzmetinde Atyraý oblystyq jastar saıasaty máseleleri basqarmasynyń basshysy Rollan Quspannyń qatysýymen baspasóz jıyny ótti. Baıandamashynyń aıtýynsha, óńirde jastar saıasaty máseleleri basqarmasy jastarmen qarqyndy jumys jasap, qaıyrymdylyq pen kásipkerlikke qoldaý bildirip, jumysqa ornalasý men turǵyn úı máseleleri boıynsha kómek kórsetip keledi.
«Bıylǵy jyly bizde kóptegen ózgerister bar. Stýdentterge qoǵamdyq kólikte júrýge 50% jeńildik berildi, buǵan jergilikti bıýdjetten 313,6 mln. teńge bólindi. Budan bólek, osy jazda «Jasyl el» baǵdarlamasy boıynsha 2000 stýdent qamtylady, olarǵa 61 000 teńge kóleminde aılyq tólenedi. Aıta ketý kerek, osy jyldyń shilde aıynda jas otbasylarǵa «Jas Otaý» baǵdarlamasy boıynsha 100 páterli kóp qabatty turǵyn úı paıdalanýǵa beriledi», deıdi Rollan Quspan.
Sonymen qatar, úkimettik emes uıymdardy memlekettik jastar saıasatyn damytý úshin óńirlik deńgeıde sheshimder qabyldaýǵa tartý maqsatynda belsendi jumys júrgizilýde. Memlekettik áleýmettik tapsyrys aıasyndaǵy úkimettik emes jastar uıymdary birqatar áleýmettik mańyzy bar jobalardy iske asyrýda: stýdenttik ózin-ózi basqarýdy damytý, oblystyq Delfıı oıyndaryn uıymdastyrý, bos ýaqytyn tıimdi ótkizýdi uıymdastyrý, qyzmetin uıymdastyrý, áleýmettik osal jáne jaǵdaıy tómen jastarmen jumys uıymdastyrý, sybaılas jemqorlyqqa qarsy sana qalyptastyrý, buqaralyq sportty nasıhattaý jáne sýbmádenıet ókilderiniń áleýetin arttyrý, Astananyń 20 jyldyǵyna arnalǵan is-sharalar keshenin uıymdastyrý jáne t.b.
Munaıly óńirde memlekettik baǵdarlamalar da qarqyndy iske asýda.
«Dıplommen aýylǵa» baǵdarlamasy boıynsha 32 jas mamanǵa bıýdjettik nesıe berildi, 125-i bir rettik áleýmettik kómekpen qamtyldy. Jumyspen qamtýǵa baılanysty 2017-2021 jyldarǵa arnalǵan buqaralyq kásipkerlikti damytý jáne ónimdi jumyspen qamtý baǵdarlamasy boıynsha jumys ornynda 2419 jas, onyń ishinde aýyldyq jastardyń 2020 ókili qamtyldy. «Bıznes Bastaý» jobasynyń málimeti boıynsha, 1 325 adam kásipkerliktiń negizin úırendi, olarǵa 669.938 mıllıon teńge kóleminde mıkrokredıtter berildi», deıdi Atyraý oblystyq jastar saıasaty máseleleri basqarmasynyń basshysy Rollan Quspan.
