Búgingi tańda aýrýhanada japonııalyq grantpen berilgen qurylǵylardyń ishinde kompıýterlik tomograf, laparoskopııalyq jabdyq, rentgen jabdyǵy, zerthanalyq-dıagnostıkalyq qurylǵy, mıkroskoptar, analızatorlar, ÝDZ apparattary, elektrondy-optıka óńdegish, tasymaldanatyn rentgen apparattary qoldanylady.
Medısınalyq tehnıkanyń jaı-kúıine ózderiniń oń baǵasyn bergen delegasııa músheleri Japonııanyń aldaǵy ýaqytta yntymaqtastyqta jumys isteýge daıyn ekendigin jetkizdi.
«Medısınalyq jabdyqtardyń jaı-kúıi onyń qanshalyqty uqypty paıdalanylatyndyǵyna baılanysty. Búgin qondyrǵylar men qurylǵylardy kórip, tań qalǵanym ras. Biraz jyl buryn shyǵarylǵandyǵyna qaramastan, tehnıka jumys istep tur. Tipti,olardyń arasynda áli de jóndeýge berilmegen qurylǵylar bar. Qazaqstan – damýshy memleket. Al medısına salasy zaman talaptaryna jaýap berýi tıis. Biz sizdiń elge bul iste qolymyzdyń ushyn berip, aldaǵy ýaqytta birge jumys isteýge daıynbyz», – dedi Japonııanyń qarjy mınıstrligi Bıýdjettik bıýrosynyń sheteldik ister bıýdjeti jónindegi ınspektory Vatanabe Masaakı.
Kezdesý barysynda aýrýhana qurylymyna energııa saqtaýshy elementterdi engizý jáne ınnovasııalyq tehnologııalardy engizýdiń strategııalyq baǵytyn ózgertý máseleleri talqylandy.
Shara sońynda qalalyq № 2 balalar aýrýhanasynyń jetekshiligi medısınalyq mekemeniń ınfraqurylymyn damytýda eki el arasyndaǵy yntymaqtastyqtyń mańyzdylyǵyn tilge tıek etti. Bul óz kezeginde eki tarapqa aýrýhana menedjmentinde óz tájirıbesimen bólisýge septigin tıgizbek.
