GFR Bilim jáne mádenıet mınıstrler keńesi nemis eliniń joǵary oqý oryndaryna Nazarbaev zııatkerlik mektepteriniń túlekterine arnalǵan arnaıy nusqaýlyq jiberdi. Keńes zııatkerlik mektepter túlekteriniń sertıfıkatyn Germanııanyń joǵary oqý oryndarynda tikeleı bilim alýǵa jaramdy dep tapty. Bul týraly GFR-dyń Qazaqstan Respýblıkasyndaǵy Tótenshe jáne О́kiletti Elshisi Rolf Mafaeldiń «Nazarbaev zııatkerlik mektepteri» derbes bilim berý uıymy basqarmasynyń tóraıymy Kúlásh Shámshıdınovaǵa joldaǵan resmı hatynda jazylǵan. Hatta nemis ýnıversıtetteri stýdentterdi qabyldaý týraly sheshim qabyldaýda táýelsiz ekendigi túsindirilgen. Alaıda, Bilim jáne mádenıet mınıstrliginiń janyndaǵy Turaqty konferensııanyń keńesi nusqaýlyq negizinde sheteldik mektep sertıfıkattaryn taný týraly óz ýnıversıtetterine usynys jasaýǵa quqyly.
Rolf Mafaeldiń hatyna sáıkes NIS Grade 12 Certificate matematıka, tehnıka, ǵylym, medısına, qoǵamdyq, áleýmettik, ekonomıkalyq, til salalarynda, sondaı-aq sport jáne óner mamandyqtary boıynsha joǵary oqý oryndarynda salalyq oqytýǵa múmkindik beredi. Bul zııatkerlik mektepterdiń túlekteri Germanııanyń joǵary oqý oryndaryna Foundation kýrsyn oqýsyz, tikeleı birinshi kýrsqa qabyldanady degen sóz. Atalǵan nusqaýlyq 2018 jylǵy jazǵy semestrden bastap kúshine enedi. Nemis keńesiniń sheshimi zııatkerlik mektepterdiń halyqaralyq jetistikterin rastap, qazaqstandyq-germandyq bilim berý jáne gýmanıtarlyq yntymaqtastyqty damytý úshin jańa satylarǵa jol ashady.
