Shyǵarmany túrik tilinde sóıletken aýdarmashy Jamılá Kynajy: «Meniń atym Qoja túrik rýhanııatyn baıytyp, kópshiliktiń súıikti kitabyna aınalatynyna nyq senimdimin. Soqpaqbaev ulttyq beınesi kúshti adam. Ol bir balanyń kózi arqyly tutas ulttyń beınesin beredi. Keıipker Qoja kishkentaı bolǵanymen onyń dúnıetanymy keń. Ol únemi ádildik pen adaldyqty tý etedi. Biz bir-birine qatty uqsaıtyn baýyrlas halyqpyz. Túriktiń balasy men qazaqtyń balasynda aıyrmashylyq joq dep oılaımyn. Sondyqtan, qazaqtyń Qojasy – bizdiń de Qoja» deıdi.
Eske salar bolsaq, sanaýly kúnder buryn Memleket basshysynyń «Rýhanı jańǵyrý» baǵdarlamasy men Astananyń 20 jyldyǵyna oraı Túrkııa elinde Qazaqstan kúnderi bastalǵan bolatyn. Osyǵan oraı eki eldiń rýhanı murasyn odan ári jaqyndata túsetin birqatar mádenı sharalar legi josparlanǵan.
Kitaptyń tanystyrylymynda povest jelisimen túsirilgen Abdolla Qarsaqbaevtyń «Meniń atym Qoja» fılimin buǵan deıin tamashalap úlgergenin aıtqan túrik jastary, Qoja beınesin kitaptan oqýǵa múmkindik týyp otyrǵany ózderi úshin úlken olja ekenin jetkizgen. Qazaqstannyń Túrkııadaǵy elshiligi aldaǵy ýaqytta fılimdi túrik tilinde dýblıaj jasatyp, Túrkııanyń basty arnalarynda kórsetýdi josparlap otyr.
Kóńil qýantarlyǵy sol, bir ǵana «Rýhanı jańǵyrý» baǵdarlamasynyń aıasynda qazaq aqyn-jazýshylarynyń 20-dan astam týyndysy túrik tiline aýdarylyp úlgergen. Bul týyndylar qazirdiń ózinde túrkııalyq oqyrman qaýymnyń joǵary baǵasyna ıe bolsa kerek.
Arman OKTIаBR,
«Egemen Qazaqstan»
