Nátıjesinde kólemi 1500 sharshy metrden asatyn 1243 nysan tekseristen ótip, onda 15 myń ereje buzýshylyq tirkelgen. О́z kezeginde ortaq talaptardy oryndaýdan jaltarǵandarǵa 19 mıllıon teńgeden astam aıyppul belgilenip otyr. Buǵan qosa, nysandardaǵy 41000 qyzmetkerge tótenshe jaǵdaı kezinde ne isteý kerektigi úıretilip, 494 oqý-taktıkalyq jıyny ótken.
Aıta keterligi, memlekettik baqylaý kezinde kózge ilikken 120 nysan qaıta tekseristen ótip, onyń ishinde 98 nysan belgilengen eskertýlerdi tolyqtaı oryndaǵan. Al oryndamaǵan 22 nysanǵa qatysty is ákimshilik kodekske saı sotqa jiberildi. Sot sheshimi boıynsha 462-bap negizinde mundaı nysandarǵa 500 eń tómengi AEK kóleminde aıyppul salynyp nemese atalǵan nysannyń jumysy úsh aıǵa deıin toqtatylmaq. Al Bilim jáne ǵylym mınıstrligine qaraıtyn bilim berý mekemelerin memlekettik baqylaý boıynsha tekserý qorytyndysyna sáıkes, 11541 nysannyń 7600-i tekserildi. Aldaǵy maýsym-shilde aılarynda tekseris jumystary tolyǵymen aıaqtalady. Eskertýlerdi oryndamaǵan bilim mekemeleriniń isin sotqa jiberip, ári qaraı olarǵa da aıyppul salý nemese ýaqytsha jumysyn toqtatý jazasy qoldanylmaq.
Ishki ister mınıstri orynbasarynyń habarlaýynsha, respýblıka boıynsha bıyl orman órtiniń sany – 71-ge jetken. Orman órti elimizdiń shyǵys óńirinde jıi oryn alady. Kórsetkishterge kelsek, ótken jylmen salystyrǵanda jazyq alqaptar men nýly ormandardaǵy órttiń sany bıyl aıtarlyqtaı artyp otyr. Tilsiz jaýdan keletin qaýiptiń aldyn alý maqsatynda oblys jáne aýdan ortalyqtary tehnıkalyq qural-jabdyqtarmen qamtamasyz etilip, daıyndyq sharalaryna ázirlikti bastap ketken.
Al el aýmaǵyndaǵy jazǵy lagerler men demalys, saýyqtyrý ortalyqtaryna taıaý arada jappaı tekseris júrgiziledi. Ishki ister mınıstriniń orynbasary keltirgen málimet boıynsha, bıyl jaz bastalmaı jatyp 28 adam sýǵa ketken, onyń 11-i balalar ekendigi anyqtalyp otyr. Kóp jaǵdaıda jeke turǵyn úılerdiń aýlalarynda 3-4 jasar balalar ata-analarynyń qaraýynsyz qalyp, qaıǵyly jaǵdaıǵa tap bolady. Osyǵan baılanysty mektepterdegi ata-analar jınalysynda arnaıy túsindirý jumystary júrgizilip, qaýipsizdik saqtaý erejelerimen tanystyrý sharalary ótkizildi.
Erkejan AITQAZY,
«Egemen Qazaqstan»
