«Biz Qytaımen jan-jaqty strategııalyq áriptestikke zor mańyz beremiz, ony nyǵaıtýǵa bizdiń memleketterimizdiń basshylary Nursultan Nazarbaev pen Sı Szınpın sheshýshi úles qosty», - dep atap ótti Q.Toqaev.
Qazaqstan Parlamenti joǵarǵy Palatasynyń basshysy Prezıdent N. Nazarbaevtyń Qytaıǵa aldaǵy memlekettik sapary men onyń Sındaodaǵy ShYU Sammıtine qatysýy ekijaqty qatynastarǵa jańa serpin beretinine senim bildirdi.
Q.Toqaev zań shyǵarý organdary deńgeıindegi baılanystar qarqynynyń arta túsýin saıası únqatysýdyń mańyzdy bóligi ekenin aıtty. Kóptarapty parlamentaralyq uıymdar aıasyndaǵy kúsh-jigerdi úılestirý jańa múmkindikter ashatyn bolady.
Senat Tóraǵasy dinder jáne órkenıetter únqatysýyn nyǵaıtý isindegi Qazaqstannyń kúsh-jigeri týraly qytaı jaǵyn habardar etip, aldaǵy 10-11 qazanda Astanada Álemdik jáne dástúrli dinder lıderleri VI Seziniń kún tártibi «Dinı kóshbasshylar qaýipsiz álem jolynda» taqyrybyna arnalatynyn atap ótti.
A. Imıngbahaı Qazaqstanmen strategııalyq áriptestikti damytýǵa Qytaıda basa nazar aýdaryp otyrǵanyn jáne aldaǵy maýsymdaǵy joǵary deńgeıdegi kezdesý nátıjeli bolýyna zor kúsh-jiger salyp otyrǵanyn aıtty.
QHR Parlamentiniń Vıse-spıkeri parlamentaralyq baılanystardy tereńdetýge arnalǵan birqatar usynystar aıtty. Atap aıtqanda, A. Imıngbahaı Qazaqstan parlamentshilerine Qytaıdaǵy birlesken semınarǵa shaqyrýdy jetkizdi. HО́BJ delegasııasynyń basshysy qaýipsizdikti qamtamasyz etý jáne terrorızmge qarsy is-qımyl jónindegi zańnamalyq sharalar salasynda tájirıbe almasýdy belsendi túrde júrgizýge shaqyrdy. Odan basqa, halyq dıplomatııasyna qarqyn berýge, ǵylymı-tehnıkalyq, bilim berý, mádenı salalardaǵy baılanystardy jalǵastyrýǵa yqylas bildirdi.
Áńgime barysynda saýda-ekonomıkalyq jáne kólik-logıstıka yntymaqtastyǵyn jańa deńgeıge kóterý múmkindigi talqylandy. Q.Toqaev qytaılyq transqurylyqtyq «Bir beldeý, bir jol» jobasy men Qazaqstannyń «Nurly jol» baǵdarlamasynyń úılesýi arqasynda ashylatyn aýqymdy múmkindikterge nazar aýdardy. Aılıgeng Imıngbahaı óz kezeginde elektrondyq kommersııa men sıfrlyq tehnologııa sekildi keleshegi bar salalar ózara is-qımylǵa jańa serpin beretini týraly pikirin bildirdi.
Q.Toqaev qorytyndy sózinde túrli saladaǵy ózara áriptestik qatynastar ornaǵan kórshi memleketter arasynda qandaı da bir ózekti máseleler týyndaýy yqtımal ekenin, sondyqtan olar dostyq rýhyndaǵy dıplomatııalyq konsýltasııalar men kelissózder arqyly ǵana sheshilýi tıis ekenin atap ótti. Tóraǵa aldaǵy joǵarydaǵy kezdesýde barlyq máseleler tıimdi kelisimderge kelý, ózara senim jáne dástúrli dostyq negizderinde sheshiletinine senim bildirdi.
