Sonyń eń soraqysy, qoǵamdyq kólikterde ózin «Ońaı!» baqylaýshylarymyz» dep tanystyryp, jolaýshylardyń kartasynan aqsha sheship alatyn jalǵan baqylaýshylar paıda boldy degen aqparattyń qaýlaýy deýge bolady. Osyǵan qatysty jaýapty mamandar ne deıdi?
Áleýmettik jelilerdi asha qalsańyz, mundaı aqparattardy kóptep kezdestiresiz. Máselen, Almaty qalasynyń turǵyny Maqsat Dúısenov óziniń «Ońaı» kartasyndaǵy aqshasynyń bir emes, birneshe márte kemip qalǵanyn aıtady. «Kún saıyn qoǵamdyq kólik qyzmetin qoldanamyn. Kóp kólemdegi qarajat bolmaǵan soń teńgerimimdegi aqsham azaıyp qalǵanyna basynda asa mán bermegen bolatynmyn. Keıin jaqyn dosymnan «tólem tekserýshilermiz dep jolaýshylardy aldap aqsha jasaıtyn alaıaqtar shyǵypty» degendi estigende oılanyp qaldym. Sodan bastap baqylaýshylarǵa kartamdy usynǵanda saq qaraıtyn boldym» deıdi ol.
О́zderin «Ońaı!» kartasynyń baqylaýshylary dep tanystyratyn beıtanys adamdardyń kóbeıip ketýine baılanysty jaýapty mamandar qoǵamdyq kólik qyzmetin qoldanatyn almatylyqtarǵa saq júrip, muqııat bolýǵa keńes beredi.
– Azamattar baqylaýshylardyń jol aqysynyń tólemin tekserý úshin kartany jolaýshylardan surap alyp, olardy mobıldi termınal arqyly ótkizip, sol arqyly kartadan qarajatty qaıta sheship alyp jatatynyn aıtyp, jıi shaǵym túsiredi. Mundaı jaǵdaıda jolaýshy Almaty kólik holdıngine ótinish jazýyna bolady. Osylaısha, qaıtalanyp alynǵan soma kartanyń teńgerimine qaıtarylady. Osyndaı keleńsiz jaǵdaılar qaıtalanbas úshin kartany qoǵamdyq kólik kondýktorlaryna bermeýge keńes beremiz. О́ıtkeni olar AHK-niń de, tasymaldaýshy-kompanııanyń da resmı túrdegi qyzmetkerleri emes. Kartany tek arnaıy forma kıgen, beıdji jáne jeke kýálik pen baqylaýshynyń ókileti bar, resmı túrde jumys atqaratyn baqylaýshylarǵa tekserý úshin berý qajet. Eger qoǵamdyq kólikten jalǵan baqylaýshyny baıqaǵan bolsańyz, tez arada «Ońaı!» baılanys ortalyǵyna habar berýińizdi suraımyz, – deıdi Almaty kólik holdınginiń dırektory Sadır Hamraev.
Ázirge esh jerde mundaı quqyq buzýshylyq faktisi resmı túrde tirkelmegen. Alaıda joǵaryda keltirgenimizdeı, bul máselege qatysty dabyl qaqqan jolaýshylar joq emes. Qalaı bolǵanda da, áńgime beker aıtylmasa kerek. «Ońaı» ońaı demeńiz, abaı bolyńyz!
Arman OKTIаBR,
«Egemen Qazaqstan»
ALMATY
