«Agenttiktiń Sybaılas jemqorlyqqa qarsy is-qımyl ulttyq bıýrosy Energetıka vıse-mınıstri Jaqsalıevtiń Shýchınsk-Býrabaı kýrorttyq aımaǵyndaǵy kóldi tazartý boıynsha jumystardy qabyldaý barysyndaǵy zańǵa qaıshy áreketterin áshkereledi. Kúdikti vıse-mınıstr 2015 jyly «Aımaq ı K» JShS merdiger uıymynyń múddesi úshin laýazymdyq ókilettigin teris paıdalanǵan», - dedi ol.
Onyń aıtýynsha, Jaqsalıev oryndalǵan jumystyń kólemi 30 ese artyq baǵalanǵanyn bile otyryp, jalpy somasy 863 mln teńgeni quraıtyn sý qoımasynyń túbinen 109 myń tekshe metr shógindilerdi alý týraly aktilerge qol qoıyp, atalǵan somany merdigerge aýdarǵan.
«Sonymen qatar, sot saraptamasynyń qorytyndysy boıynsha aıaqtalmaǵan jumystardyń quny 746 mln teńgeni qurady. Jaqsalıevtiń zańsyz áreketteri nátıjesinde memleketke atalǵan somaǵa zııan keltirildi. Kúdikti úıqamaqqa alyndy», - dedi Jahın.
Aıta keteıik, bul, jemqorlyq kúdigi boıynsha ustalyp otyrǵan Energetıka mınıstriniń ekinshi orynbasary. Aǵymdaǵy jyldyń 2 naýryzy kúni Astana qalasynyń №2 Almaty aýdandyq soty vıse-mınıstr Ǵanı Sádibekovti eki aıǵa qamaýda ustaý túrindegi bultartpaý sharasyn qoldaný týraly sheshim shyǵardy. Keıin mınıstr orynbasarynyń qamaýda ustaý túrindegi bultartpaý sharasy úıqamaqqa aýystyryldy.
Ǵ.Sádibekovke «Aımaq» JShS merdigerlik uıymynyń basshysy D. Dýanbekpen sóz baılasyp, Shýchınsk-Býrabaı kýrorttyq aımaǵyndaǵy kóldi tazartýǵa bólingen asa iri mólsherdegi bıýdjet qarajatyn jymqyrdy degen aıyp taǵylyp otyr. Qylmysqa Energetıka mınıstrliginiń departament basshysy J. Nurbekov jáne merdiger uıymnyń ókilderi S. Jumalınov jáne B. Qadyrberlın de qatysqan.
