Jambyl Serǵazyuly grek-rım kúresimen kóp jyl aınalysyp, О́zbekstan, Qyrǵyzstan, Qazaqstannyń chempıony bolǵan. Onyń bastamasymen daryndy balalarǵa arnalǵan sport mektep-ınternaty ashylyp, halyqaralyq dodalarda olja salǵan Roman Meleshın, Danııar Kálenov, Aqan Baımaǵambetov, Amanǵalı Bekbolov sekildi sańlaq sportshylar tárbıelenip shyqqan.
Dene shynyqtyrý jáne sport basqarmasynyń jetekshisi Rýslan Esenalın quttyqtaý sózinde dástúrge aınalǵan jarys halyqaralyq mártebe alyp, qatysýshylar qatary kóbeıip kele jatqanyn jetkizdi. Aımaq basshysynyń qoldaýymen kásipqoı palýandardyń «Qyzyljar arlandary»klýbynyń qurylǵanyn atap ótti.
Eki kúnge sozylǵan tartysty básekede alań ıeleri Stanıslav Iаrosh (67 kg), Zelımhan Ýsmanov (72 kg), Aıbek Qýanyshev (77 kg), Stanıslav Rylskıı (87 kg) jáne Janarbek Qabdolov (97 kg) jeńimpaz atandy. Chelıabilik Alekseı Mırzakabılov aqtyq aıqasta petropavldyq Ramazan Kúzentaevtyń jaýyrynyn jer ıisketip, 55 kılo salmaqta chempıon boldy. 60 kılo salmaqta Almaty oblysynyń namysyn qorǵaǵan Oljas Sultan barlyq qarsylasynan basym tústi.
Jeńimpazdar men júldegerler zattaı, aqshalaı syılyqtarmen marapattaldy.
О́mir ESQALI,
«Egemen Qazaqstan»
