Alǵashqy kúni mektep kerýeni Ulytaý aýdanyna aıaldady. «Qoldaıyq, aýyl mektebin!» aksııasy aıasynda zııatkerlik mektep oqýshylary Ulytaý kentiniń №1 orta mektebindegi qurdastarymen kezdesti. Jergilikti pedagogtarǵa qaraǵandylyq áriptesteri zııatkerlik mektepter tájirıbesin taratý boıynsha aýqymdy baǵdarlamalar keshenin usyndy. Onda ádistemelik keńes berý, sheberlik saǵattar, oqytýdyń jańartylǵan mazmuny men krıterıaldy baǵalaý týraly trenıngter boldy. Al Jezqazǵan qalasyndaǵy №8 orta mektep-gımnazııasyna Sátbaev, Balqash, Jańaarqa, Ulytaý kentteri men basqa da aýdandardyń muǵalimderi jınaldy.
Pán muǵalimderine úsh tildik bilim berý, bilim berýdi sıfrlandyrý, krıterıaldy baǵalaý, jańartylǵan mazmundaǵy oqýlyqtar baǵytynda sheberlik synyptary ótti. Júıelik-ádistemelik keshende jınalǵan materıaldardy júkteý úshin konsýltasııalyq saıttar men júkteý bólimderi jumys istedi. Sol kúni qaraǵandylyq delegasııa Qarttar úıine baryp, ardagerlerge konsert uıymdastyrdy, kitaptar men syılyqtar tartý etti. Úshinshi kúni ortalyq alańda balalardyń shyǵarmashylyq jumystary, ıaǵnı keramıka, kilem toqý, keskindeme, grafıka jáne basqa da qolóner buıymdary usynylǵan «Sheberler qalasy» kórmesi uıymdastyryldy. Ájeler ujymy kıiz toqý boıynsha sheberlik-synybyn ázirledi. «Qara jorǵa» fleshmoby, ekovelosherýi, «Jezqazǵan óńirin damytý úshin ne qajet?» taqyrybyndaǵy TEDx, «Qazaqtyń júz áni», «100 kitap», «100 kúı» áleýmettik jobalary qorytyndysy boıynsha ázirlengen jumystar tanystyryldy.
Memlekettik rámizder kúni aıasynda ótip, aımaqtyq «Rýhanı jańǵyrý» ulttyq baǵdarlamalar tizimine engen «Uly dala muragerleriniń» epısentri qalalyq dostyq úıi boldy. Munda Nazarbaev zııatkerlik mektepteri oqýshylarynyń ǵylymı, áleýmettik jáne shyǵarmashylyq jobalarynyń úlken kórmesi ashyldy. Qazaqstan tarıhyndaǵy mańyzdy oqıǵalardy kórsetken Atyraý zııatkerlik mektebiniń kóleńke teatry, Taldyqorǵan mektebiniń Vasılıı Izosımovtyń basshylyǵyndaǵy hory, Qaraǵandy mektebiniń dombyra orkestri, Uly Jibek jolynyń ómirinen horeografııalyq qoıylymnyń qatysýshylary jáne basqa da jas talanttar kórermenderdiń shynaıy yqylasyna bólendi. Qaraǵandy oblysynyń ákimi Erlan Qoshanov Nazarbaev zııatkerlik mektepteriniń desanttary men «Uly dala muragerleri» shyǵarmashylyq esebi Jezqazǵan óńirine joǵary kóńil kúı syılap, rýhanı silkinis jasaǵanyn atap ótti.
