Ekspozısııaǵa Dımash Qudaıbergenniń jeke qorynan alynǵan 70 mýzykalyq aspap qoıyldy. Olardyń arasynda álemniń ár qıyrynan jankúıerleri syıǵa tartqan aspaptar bar. Sondaı-aq kórmede ánshiniń sahnalyq kostıýmderi usynylǵan. Kórermenge erekshe áser qaldyrǵan jádigerdiń biri – álemdik pop-mádenıet juldyzy Maıkl Djeksonniń jeke stılısti Goko Zaldı arnaıy tikken sahnalyq kıim.
Kórmeniń mánin arttyrǵan sátterdiń biri – Dımash Qudaıbergenniń mýzeı qoryna eki dombyrasyn tabystaýy. Onyń biri bala kúninen qolynan túspegen, atasy syılaǵan dombyra bolsa, ekinshisi – óner ıesiniń qoltańbasy qoıylǵan aspap. О́z kezeginde Almaty qalasy mýzeıler birlestiginiń dırektory Lázzat Qudaıbergenqyzy mýzeı ujymy atynan Dımashqa Abaı Qunanbaıulynyń dombyrasynyń dál kóshirmesin tartý etti. Bul syı – rýhanı sabaqtastyq pen ulttyq qundylyqqa degen ózara qurmettiń belgisi retinde baǵalandy.
Túrkistanda Dımash Qudaıbergenniń prodıýserlik «Voice Beyond Horizon» jobasy bastaldy
Dımash Qudaıbergenniń ákesi, Qazaqstannyń Mádenıet qaıratkeri Qanat Aıtbaev kórmeniń mazmundyq mańyzyna toqtalyp, onyń jeke kolleksııany tanystyrýmen shektelmeıtinin aıtty. Onyń sózinshe, bul bastama ulttyq ónerdi dáriptep qana qoımaı, túrli halyqtyń mýzykalyq murasyn bir keńistikte toǵystyrǵan taǵylymdy joba.
«Bul aspaptardyń árqaısysy biz úshin asa qymbat. Sebebi olar álemniń ár túkpirinen jınalǵan, ár halyqtyń tól mádenıetin tanytady. Ár aspaptyń artynda óz tarıhy bar. Osyndaı qundy dúnıelerdi tartý etken barsha azamatqa alǵysymyz sheksiz», dedi Dımash Qudaıbergenniń anasy, Qazaqstannyń Eńbek sińirgen qaıratkeri Svetlana Aıtbaeva.
Is-sharaǵa Almaty qalasy Mádenıet basqarmasynyń basshysy Danııar Alıev, TÚRKSOI uıymyndaǵy Qazaqstannyń resmı ókili Nyshankúl Qarataeva, mádenıet pen óner qaıratkerleri, zııaly qaýym ókilderi, buqaralyq aqparat quraldary jáne ánshiniń jankúıerleri qatysty.
«Dımash: bir daýys – myń el» kórmesi ónerdiń ult pen shekaraǵa baǵynbaıtynyn aıqyn kórsetedi. Ekspozısııa kelýshilerge ánshiniń shyǵarmashylyq álemin tereńirek tanyp, ulttyq mýzykalyq aspaptardyń baı murasyn sezinýge múmkindik beredi.
Kórme bir aı boıy Almaty qalasy, Zenkov kóshesi, 24a mekenjaıynda ornalasqan Yqylas atyndaǵy halyq mýzykalyq aspaptar mýzeıinde jalǵasady.
Bunyń aldynda Dımash Qudaıbergen olımpıada chempıony Mıhaıl Shaıdorovqa kólik syılap, el yqylasyna bólengen edi.
