Foto: Aqorda
Prezıdent osyǵan oraı tıisti Zań qabyldanǵanyn, arnaıy Jarlyqqa qol qoıǵanyn tilge tıek etti.
«Bul kúlli túrki dúnıesi úshin mán-maǵynasy aıryqsha marapat dep aıtýǵa bolady. Sol sebepti keshe alǵashqy mártebeli nagradany asa qurmetti Prezıdent Rejep Taııp Erdoǵanǵa saltanatty túrde tabystadym.
Osylaısha, biz túrki rýhanııatynyń temirqazyǵy – Iаsaýı tulǵasyn dáripteı otyryp, halyqtarymyzdyń arasyndaǵy myzǵymas baýyrlastyq tamyryn nyǵaıta beremiz dep senemin», dedi Qasym-Jomart Toqaev.
Memleket basshysynyń aıtýynsha, búginde Túrkistan – kóne men keleshekti toǵystyrǵan shyraıly shahar.
«Aımaqtyń ekonomıkalyq áleýeti jyl ótken saıyn artyp keledi. Byltyr oblystyń ekonomıkasy 9,3 paıyzǵa ósti, onyń kólemi 10 mıllıard dollardan asty. Aımaqqa 3,5 mıllıard dollar ınvestısııa tartyldy», dedi Prezıdent.
Qasym-Jomart Toqaevtyń aıtýynsha, Alqaly jıyndy osynda ótkizýdiń maqsaty – atajurtta baýyrlas elderdiń kóshbasshylarymen júzdesý, qaıta túlegen Túrkistandy tórtkúl dúnıege tanytý.
«Biz kıeli ordanyń tarıhy qandaı tereń bolsa, bolashaǵy da sondaı jarqyn bolaryna nyq senimmen qaraımyz. Osy múmkindikti paıdalanyp, búgin Túrkistanda О́zbekstannyń qoldaýymen jańa záýlim meshit ashylǵanyn úlken rızashylyqpen atap ótkim keledi.
Erekshe tartý jasaǵany úshin О́zbekstan Prezıdenti, asa qadirli Shavkat Mıromonuly Mırzııoevke jáne ózbek halqyna alǵysymdy bildiremin.
Elderimizdiń rýhanııatyndaǵy osy meshittiń orny erekshe bolmaq. Bul – qazaq-ózbek halyqtary yntymaǵynyń tarıhı sımvoly», dedi Qasym-Jomart Toqaev.
Memleket basshysy almaǵaıyp kezeńde túrki memleketteriniń aýyzbirshilikte bolýy – óte mańyzdy ekenin atap ótti.
«Biz halyqaralyq geosaıası ahýal asa kúrdeli jáne qubylmaly dáýirdi bastan ótkerýdemiz. Álemdik jáne aımaqtyq deńgeıdegi báseke kúsheıip barady. Qarýly qaqtyǵystar, soǵystar tolastar emes. Munyń bári álem ekonomıkasyna keri áser etip jatqanyn bárimiz kórip otyrmyz. Taıaý Shyǵystaǵy jaǵdaıdyń saldaryn kórshiles aımaq elderi de sezine bastady. Osyndaı almaǵaıyp kezeńde túrki memleketteriniń aýyzbirshilikte bolýy – óte mańyzdy. Sebebi halyqtarymyzǵa ortaq san ǵasyrlyq shejiremiz bar. Qazirgi tańda túrki elderi zaman talabyn eskerip, ekonomıka jáne ınvestısııa salasyndaǵy yqpaldastyqty nyǵaıtýy kerek, ortaq múdde jolynda kúsh jumyldyrýǵa tıis dep sanaımyn», dedi Prezıdent.
Eske sala keteıik, Memleket basshysy Qasym-Jomart Toqaev Túrki memleketteri uıymynyń beıresmı sammıtinde sóz sóılep, jasandy ıntellekt ortalyqtarynyń jelisin qurýdy usyndy.
