Memleketter basshylary XIV-XV ǵasyrlarǵa tıesili cırek jádigerler kórmesin tamashalady. Ol Qoja Ahmet Iаsaýıdiń ómir joly men keseneniń tarıhynan syr shertedi. Sonyń ishinde XIV ǵasyrdan beri saqtalǵan qabirhananyń aǵash esigi bar. Esik súıekpen, qańyltyrmen jáne altyn jalatylǵan jazýlarmen bezendirilgen. Sondaı-aq kýfa men sýlýs úlgisindegi arab mátinimen órnektelgen.
Mártebeli meımandarǵa Ámir Temirdiń tapsyrysymen jasalǵan qola shyraǵdandar, XV ǵasyrǵa tán aspaly qola kándılder men aıdahar beınesinde naqyshtalǵan qos qulaqty shamdar kórsetildi.
Memleket basshysy: Túrkistan – atajurtymyzdyń myzǵymas temirqazyǵy
Kórmeniń erekshe sáýlettik elementi – kesene kúmbeziniń ushar basynda ornalasqan kóne kýbba (mystan jasalǵan).
Zaldaǵy asa qundy jádigerdiń biri – XVIII-XIX ǵasyrlarǵa jatatyn Qoja Ahmet Iаsaýı qulpytasynyń qabirjapqyshy. Onyń bederli oıý-órnekteri dinı sımvolızmdi, geometrııalyq kompozısııany, kallıgrafııany ushtastyrady. Ortalyq Azııadaǵy ıslam mádenıetinde qabirjapqysh rýhanı qurmettiń belgisi sanalady.
Eske sala keteıik, Túrkistanda Túrki memleketteri uıymynyń beıresmı sammıti ótti. Sammıt aldynda Qasym-Jomart Toqaev pen Shavkat Mırzııoev Qazaqstan men О́zbekstan arasyndaǵy baýyrlastyq baılanys jáne rýhanı yntymaqtastyq nyshany retinde Túrkistanda boı kótergen meshitpen tanysty.
