QHR Halyqaralyq saýda boıynsha kómek komıteti jáne «Samuryq-Qazyna» AQ birlese uıymdastyrǵan jıynǵa qazaqstandyq ulttyq jáne jeke kompanııalardyń top-menedjerleri jáne qytaılyq bıznes qaýymdastyqtyń 300-den astam ókili, onyń ishinde Qytaıdaǵy iri memlekettik korporasııalardyń basshylary qatysýda.
«Biz aldaǵy ýaqytta ekijaqty ekonomıkalyq qarym-qatynasty barynsha qarqyndy damytýǵa múddelimiz jáne keshegi eki eldiń kóshbasshylary qol jetkizgen kelisimder, qol qoıylǵan qujattar taǵy bir márte muny rastaıdy jáne bizdiń memleketterdegi bıznestiń ózara is-áreketine jáne damýyna jańa múmkindik beredi. Búginde Qazaqstan – ınvestısııalyq áleýeti zor memleket. Bul maqsatta bıznesti júrgizý sharttaryn jaqsartý jáne tikeleı ınvestısııalar aǵymy boıynsha júıeli jumys júrgizilýde. Búgingi besinshi otyrysta quny 13 mlrd AQSh dollardy kuraıtyn 40-tan astam kommersııalyq kelisimge qol qoıý josparlanyp otyr», - dep atap ótti óz sózinde «Samuryq-Qazyna» AQ Basqarma tóraǵasy A. Esimov.
Sonyń ishinde «Samuryq-Qazyna» AQ jáne Qytaıdyń iri ınvestısııalyq kompanııalarynyń birine aınalǵan «WintaGroup» ózara túsinistik týraly memorandýmǵa qol qoıdy. Qujat Qordyń basqarýyndaǵy arnaıy ekonomıkalyq aımaqqa qatysý, ınvestısııa salý jáne damytý boıynsha strategııalyq yntymaqtastyqty qarastyrady. KTZ Express jáne JD Logistics arasyndaǵy kelisim «Qorǵas – Shyǵys qaqpasy» AEA kólik-logıstıka ınfraqurylymy boıynsha járdemdesýdi qosa alǵanda transshekaralyq elektrondy kommersııa aıasynda logıstıkalyq jobalardy damytýǵa baǵyttalǵan. Airport Management Group jáne Beijing China-Russia united international logistics Co. Ltd Qazaqstan arqyly áýe jáne júk tasymalyn, onyń ishinde Rail Air jobasyn damytýǵa baǵyttalǵan kelisimge qol qoıdy. Taǵy úsh kelisim Qytaıdyń saýda-ónerkásiptik bankimen, CNPC GuangxiPetrochemicalCompany, sonymen qatar China Express Airlines jasaldy.
«Jaqyn arada iskerlik keńestiń qyzmetin uıymdastyrýda jańa tásilderdi ázirleýdi josparlap otyrmyz. Olar birlesken is-sharalardy, iskerlik keńesitiń jumysyn kúsheıtýge baǵyttalady», - dep A.Esimov Elbasy N.Nazarbaevtyń Qytaı kásipkerleriniń qatysýymen ótken dóńgelek ústel barysynda atap ótti.
Búginde Qazaqstan Qytaıdyń Ortalyq Azııadaǵy eń iri saýda seriktesi bolyp tabylady. Qazaqstan ekonomıkasyna quıylǵan tikeleı ınvestısııalardyń kólemi boıynsha Qytaı 4-shi orynda. Qazaqstan ekonomıkasyna baǵyttaǵan jalpy ınvestısııanyń kólemi 17 mlrd AQSh dollaryn qurady.
